Dörd bacının şəhid qardaşı
Novator.az Azərbaycan-Ermənistan sərhədinin Naxçıvan Muxtar Respublikası sahəsində şəhid olmuş 19 yaşlı əsgər Adil Əli oğlu Tatarovun vida mərasimindən fotoları təqdim edir.
Adil Tatarov mayın 20-də şəhid olub, mayın 21-də Ağstafa rayonunun Qıraq Kəsəmən kəndində torpağa tapşırılıb.
AZƏRTAC-ın məlumatına görə, vida mərasimində 2017-ci ilin aprel ayında müddətli həqiqi hərbi xidmətə çağırılan əsgərin özünü nümunəvi, bacarıqlı və hərb peşəsini dərindən mənimsəyən, komandirlərin rəğbətini və təşəkkürünü qazanan döyüşçü kimi tanıtdığı vurğulanıb. Qeyd olunub ki, döyüş hazırlıqları, fiziki və mənəvi-psixoloji hazırlıqlarda, ictimai işlərdə özünü fəal əsgər kimi təsdiqləyən Adil Tatarov təşəkkürnamə, fəxri fərman və qiymətli hədiyyələrlə mükafatlandırılıb.
Mərasimdə çıxış edən şəhidin atası Əli Tatarov dörd bacının yeganə qardaşı olan oğlunun Vətən uğrunda şəhidlik zirvəsinə ucalmasından qürur duyduğunu deyib.
1988-ci ildə başlayan Ermənistan-Azərbaycan müharibəsində 146 ağstafalı döyüşçü şəhid olub. Adil Tatarov Qıraq Kəsəmən kəndinin yeddinci şəhididir.
