Büdcə necə icra olunub?
Mayın 22-də Milli Məclisin iqtisadi siyasət, sənaye və sahibkarlıq komitəsinin iclası keçirilib. AZƏRTAC xəbər verir ki, iclasda 2017-ci ilin dövlət büdcəsinin icrası müzakirə olunub.
Hesablama Palatasının sədri Vüqar Gülməmmədov çıxışında deyib ki, 2017-ci ildə Azərbaycanın dövlət büdcəsinin gəlirlərində 15 mədaxil mənbəyi üzrə proqnoz tam icra olunub: “Yeddi mədaxil mənbəyi üzrə proqnoza əməl edilməyib. Gəlirlər üzrə ən yüksək icra göstəricisi yol vergisi üzrə (151 faiz), ən aşağı icra göstəricisi isə səhmləri dövlətə məxsus olan müəssisələr üzrə (42,9 faiz) qeydə alınıb”.
Maliyyə nazirinin müavini Azər Bayramov qeyd edib ki, 2017-ci ildə icmal büdcənin gəlirləri 24 milyard manat və ya 104,8 faiz, xərcləri 25 milyard manat və ya 82,4 faiz səviyyəsində icra olunub: “İcmal büdcə kəsiri 1,1 milyard təşkil edib. Dövlət büdcəsinin mədaxili 16 milyard 517 milyon manat və ya 98,5 faiz icra olunub. Transfert nəzərə alınmadan dövlət büdcəsinin gəlirləri 10 milyard 417 milyon təşkil edib. Bu, 2016-cı illə müqayisədə 5,3 faiz çoxdur.
Büdcə daxilolmalarının 8,6 milyard manatı qeyri-neft sektoru hesabına təmin olunub. Qeyri-neft sektorundan daxilolmaların xüsusi çəkisi 2016-cı illə müqayisədə 5 faiz bəndi artaraq 52,3 faiz təşkil edib.
Dövlət Neft Fondundan 2017-ci ildə 6,1 milyard manat vəsait transfert olunub, bu da illik müqayisədə 19,9 faiz azdır. 2017-ci ildə Azərbaycan Mərkəzi Bankının mənfəətindən 250 milyon manat dövlət büdcəsinə ödənib.
2017-ci ildə dövlət büdcəsinin xərcləri proqnoza nisbətən 98,1 faiz və ya 17 milyard 595 milyon manat səviyyəsində icra olunub. Xərclərin 62 faizi cari xərclərdir”.
Qanun layihəsi Milli Məclisin plenar iclasına tövsiyə olunub.
