Prezident serbiyalı həmkarı ilə görüşüb
Serbiya prezidenti Aleksandr Vuçiç mayın 21-dən Azərbaycanda rəsmi səfərdədir. Rəsmi qarşılanma mərasimindən sonra ali qonaq prezident İlham Əliyevlə təkbətək bir araya gəlib.
AZƏRTAC xəbər verir ki, görüşdə ikitərəfli münasibətlərin siyasi, iqtisadi və digər sahələrdə uğurla inkişaf etdiyi vurğulanıb, ölkələr arasındakı əlaqələrin daha da genişləndirilməsi üçün yaxşı potensialın olduğu bildirilib.
Söhbət zamanı ikitərəfli münasibətlər və qarşılıqlı maraq doğuran digər məsələlər ətrafında fikir mübadiləsi aparılıb.
İlham Əliyev və Aleksandr Vuçiç nümayəndə heyətlərinin iştirakı ilə geniş tərkibdə də görüşüblər.
Geniş tərkibdə görüşdən sonra prezidentlər “Azərbaycan Respublikası ilə Serbiya Respublikası arasında strateji tərəfdaşlıq üzrə birgə fəaliyyət planı”ı imzalayıblar.
İmzalanan digər sənədlər bunlardır: “Azərbaycan Respublikasının Səhiyyə Nazirliyi ilə Serbiya Respublikasının Səhiyyə Nazirliyi arasında səhiyyə və tibb elmi sahəsində əməkdaşlıq haqqında” anlaşma memorandumu; “Azərbaycan Respublikasının Ədliyyə Nazirliyi ilə Serbiya Respublikasının Ədliyyə Nazirliyi arasında əməkdaşlıq haqqında” memorandum; “Azərbaycan Respublikası Hökuməti ilə Serbiya Respublikası Hökuməti arasında bitki karantini və mühafizəsi sahəsində əməkdaşlıq haqqında” saziş; “Azərbaycan Respublikası Hökuməti ilə Serbiya Respublikası Hökuməti arasında beynəlxalq avtomobil daşımaları haqqında” saziş; “Azərbaycan Respublikası Hökuməti ilə Serbiya Respublikası Hökuməti arasında hava əlaqələri haqqında” saziş.
