Azərbaycan klublarının potensial rəqibləri
2018-2019 mövsümündə Azərbaycanı UEFA Avropa Liqasında üç klub təmsil edəcək. Hələlik onlardan ikisi məlumdur: “Qəbələ” və “Neftçi”.
Novator.az bildirir ki, Azərbaycan təmsilçiləri qrupa düşmək üçün dörd mərhələ keçməlidir. Onlar Avropa Liqasına ilkin təsnifat raundunun ardınca – 1-ci mərhələdən qoşulacaq. Bu mərhələdə “Qəbələ” və “Neftçi”yə Moldovanın, İslandiyanın, Şimali İrlandiyanın, Slovakiyanın, Bosniyanın, Monteneqronun, Albaniyanın, Gürcüstanın, Litvanın, Latviyanın, Macarıstanın, Makedoniyanın, Finlandiyanın, İrlandiyanın, Estoniyanın, Uelsin, Maltanın, Farer adalarının klublarının qismət olması mümkündür.
2-ci raunda çıxacağı halda “Qəbələ” Polşanın “Yaqelloniya”, Şotlandiyanın “Aberdin”, “Neftçi” İspaniyanın “Sevilya”, Türkiyənin “Beşiktaş”, Portuqaliyanın “Braqa”, Hollandiyanın “Alkmaar”, Almaniyanın “Leypsiq”, İngiltərənin “Bernli”, İtaliyanın “Atalanta”, Fransanın “Bordo” komandaları ilə üz-üzə gələ bilər.
Avropa Liqasının ilkin təsnifat mərhələsi 2018-ci il iyunun 28-də başlayır, iyulun 5-də bitir.
1-ci mərhələ 12-19 iyul arası, 2-ci mərhələ 26 iyul-2 avqust arası, 3-cü mərhələ 9-16 avqust arası, 4-cü mərhələ 23-30 avqust arası keçiriləcək.
Novator.az xatırladır ki, Azərbaycanı Çempionlar Liqasında təmsil edəcək “Qarabağ”ın 1-ci raunddakı potensial rəqibləri arasında “Düdelanj” (Lüksemburq), “Spartak” (Slovakiya), “Valletta” (Malta), “Vikinqur” (Farer adaları), “Kruzeyders” (Şimali İrlandiya), “Sutyeska” (Monteneqro), “Suduva” (Litva), “Kork Siti” (İrlandiya), “Spartaks” (Latviya), “Valyur” (İslandiya), “Flora” (Estoniya), “Torpedo” (Gürcüstan) komandaları var.
Bu turnirdə ilkin təsnifat mərhələsinin yarımfinal görüşləri 2018-ci il iyunun 26-da, final oyunu iyunun 29-da keçiriləcək.
1-ci mərhələnin oyunları 10-18 iyul arası, 2-ci mərhələnin oyunları 24 iyul-1 avqust arası, 3-cü mərhələnin oyunları 7-15 avqust arası, 4-cü mərhələnin oyunları 21-29 avqust arası olacaq.
Çempionlar Liqasının istənilən seçmə mərhələsindən ələnən komandalar Avropa Liqasına vəsiqə alacaq. Onlar Avropa Liqasında qrupa düşmək üçün bir-birləri ilə oynayacaq. Bu istiqamət üzrə üç ələmə mərhələsi olacaq.
