Yadigar Sadıqov Müsavat başqanının müavini vəzifəsindən istefa verib
Yadigar Sadıqov Müsavat başqanının müavini vəzifəsindən istefa verib. Report.az-a danışan Yadigar Sadıqov istefasına partiya başqanı ilə fikir ayrılığının səbəb olduğunu vurğulayıb. O bildirib ki, Divan üzvü kimi fəaliyyətini davam etdirəcək.
Novator.az bildirir ki, 2014-cü ilin sentyabr ayından Müsavat Partiyasına Arif Hacılı başqanlıq edir. Yadigar Sadıqov başqan müavini postuna həmin il, həbsdə olarkən təyin edilmişdi.
1968-ci ildə Lənkəran şəhərində anadan olan Yadigar Sadıqov 1994-cü ildə Bakı Dövlət Universitetinin tarix fakültəsini bitirib. 2000-2010-cu illərdə Lənkəran Dövlət Universitetində müəllim işləyib. 2000-ci ildən Müsavat Partiyasının üzvüdür. 2004-cü ildən 2011-ci ilə kimi Lənkəran təşkilatının sədri olub. 2011-ci ildən Müsavat başqanının müşaviri postunu tutub.
Yadigar Sadıqov 2013-cü il iyunun 27-də Lənkəranda tutulub. Lənkəran sakini Rəşid Kərimovu döyməkdə, ona bədən xəsarəti yetirməkdə ittiham olunan Yadigar Sadıqov 6 il müddətinə azadlıqdan məhrum edilib, sonra cəzası 4 ilə endirilib, 2016-cı ilin martında əfv sərəncamı ilə azadlığa çıxıb.
