Ümumi daxili məhsul: dörd ay və əvvəlki dövrlər
Dövlət Statistika Komitəsinin rəsmi hesabatına görə, 2018-ci ilin yanvar-aprel aylarında ölkədə 22,9 milyard manatlıq, əvvəlki ilin müvafiq dövrü ilə müqayisədə 1,2 faiz çox ümumi daxili məhsul (ÜDM) istehsal edilib. Əhalinin hər nəfərinə düşən ÜDM 2346 manata bərabər olub.
Novator.az bildirir ki, yanvar ayında ÜDM 2 faiz, yanvar-fevral aylarında 1,3 faiz, yanvar-mart aylarında 2,3 faiz artmışdı.
2017-ci ildə 70,1 milyard manatlıq, əvvəlki illə müqayisədə 0,2 faiz çox ümumi daxili məhsul istehsal edilmişdi.
Novator.az xatırladır ki, 2016-cı ildə Azərbaycanda ÜDM istehsalı 2015-ci ilə nisbətən 3,1% düşmüşdü. Bu, 1995-ci ildən bəri ilk azalma olmuşdu. 1995-ci ildə ÜDM əvvəlki ilə nisbətən 11,8% faiz geriləmişdi.
Sonrakı illərdə ümumi daxili məhsulun həcmi artıb: 1996-cı ildə 1,3%, 1997-ci ildə 5,8%, 1998-ci ildə 10%, 1999-cü ildə 7,4%, 2000-ci ildə 11,1%, 2001-ci ildə 9,9%, 2002-ci ildə 10,6%.
2003-cü ildə ÜDM-in artımı 11,2% təşkil edib. 2004-cü ildə 10,2%, 2005-ci ildə 26,4%, 2006-cı ildə 34,5%, 2007-ci ildə 25%, 2008-ci ildə 10,8%, 2009-cu ildə 9,3%, 2010-cu ildə 5% artım olub.
2011-ci ildə ÜDM-in həcmi əvvəlki illə müqayisədə 0,1% artıb. Qalan illərdə artım belə olub: 2012-ci il – 2,2%, 2013-cü il – 5,8%, 2014-cü il – 2,8%, 2015-ci il – 1,1%.
