Neft büdcə qiymətindən 36 dollar 3 sent bahadır
Dünya birjalarında neftin qiyməti artır. AZƏRTAC-ın 18 may məlumatına görə, “AzəriLayt” markalı neftin bir barreli 2,21 dollar bahalaşaraq 81,03 dollara yüksəlib. Bu, büdcə qiymətindən 36 dollar 3 sent yuxarı qiymətdir.
London birjasında brent markalı neftin bir barreli 79,52 dollara, Nyu-York birjasında layt markalı neftin bir barreli 71,62 dollara satılır.
Novator.az bildirir ki, Azərbaycanın 2018-ci il büdcəsində neftin qiyməti 45 dollardan götürülüb. Ölkənin gündəlik neft hasilatının yanvar ayında 814,6 min barrel, fevral ayında 806 min barrel, mart ayında 794 min barrel, aprel ayında 785,7 min barrel olduğu açıqlanıb.
2018-ci ilin yanvar-aprel aylarında Azərbaycanın ixracının 91 faizindən çoxu neft-qaz sektoruna aid olub. İxracın 81,9 faizini xam neft və xam neft məhsulları, 3,2 faizini neft məhsulları, 6 faizini təbii qaz təşkil edib.
2018-ci ilin dövlət büdcəsinin gəlirləri 20,1 milyard manat həcmində proqnozlaşdırılıb. Bunun 9,2 milyard manatı Dövlət Neft Fondundan transfertin payına düşür.
