Kimlər hökumətdən qıraqda qaldı?
Mayın 18-də Rusiya prezidenti Vladimir Putin baş nazir Dmitri Medvedyevin təqdimatı ilə hökumət üzvlərini təyin edib. Novator.az-ın məlumatına görə, baş nazirin müavinləri İqor Şuvalov, Arkadi Dvorkoviç, Dmitri Roqozin, Aleksandr Xloponin, kənd təsərrüfatı naziri Aleksandr Tkaçev, tikinti və mənzil-kommunal təsərrüfatı naziri Mixail Men, rabitə və kütləvi kommunikasiyalar naziri Nikolay Nikiforov, mülki müdafiə və fövqəladə hallar naziri Vladimir Puçkov, ekologiya və təbii sərvətlər naziri Sergey Donskoy, nəqliyyat naziri Maksim Sokolov, Şimali Qafqaz bölgəsi üzrə nazir Lev Kuznetsov, Uzaq Şərq üzrə nazir Aleksandr Qaluşka və müstəqil nazir Mixail Abızov yeni hökumətin tərkibinə daxil edilməyiblər.
Yeni kabinetdə baş nazirin birinci müavin eyni zamanda maliyyə naziri postunu tutur.
Elm və Təhsil Nazirliyi iki nazirliyə bölünüb: Maarif Nazirliyi və Elm və Ali Təhsil Nazirliyi.
Rabitə və Kütləvi Kommunikasiyalar Nazirliyinin adı Rəqəmli İnkişaf Nazirliyinə dəyişdirilib.
Mayın 8-də Rusiya Dövlət Duması Vladimir Putinin təqdimatına baxaraq Dmitri Medvedyevi baş nazir postuna təsdiqləyib.
Vladimir Putinin yeni 6 illik hakimiyyət dönəmi mayın 7-də başlayıb. Dövlət başçısı and içərək səlahiyyətlərinin icrasına başlayan kimi hökumət istefaya gedib.
52 yaşlı Dmitri Medvedyev 2005-ci ilin noyabrından baş nazirin birinci müavini olub, sonra baş nazir kürsüsünə gətirilib. 2008-2012-ci illərdə Rusiya prezidenti olub, 2012-ci ildə yenidən baş nazir təyin edilib.
