Sabirabad forumunda kredit hesabatı
İqtisadiyyat Nazirliyinin Sahibkarlığa Kömək Milli Fondu mayın 17-si Sabirabad rayonunda işgüzar forum keçirib. Rəsmi məlumata görə, forumda çıxış edən icraçı direktor Şirzad Abdullayev deyib ki, indiyədək Sabirabaddan olan 597 sahibkara 15,3 milyon manat güzəştli kredit verilib.
İşgüzar forumda Aran iqtisadi rayonunda fəaliyyət göstərən sahibkarlıq subyektləri 802,6 min manat güzəştli kredit alıb. Kreditlərin heyvandarlıq, pambıqçılıq, ədviyyat və qənnadı qatqılarının istehsalı müəssisəsinin, aqroparkın yaradılması və s. sahələrin inkişafına yönəldiləcəyi, investisiya layihələrinin reallaşdırılmasının 200-dən çox yeni iş yerinin açılmasına imkan yaradacağı bildirilir.
Ümumilikdə indiyədək Aran iqtisadi rayonunda fəaliyyət göstərən sahibkarlıq subyektlərinin 13740 investisiya layihəsinin maliyyələşdirilməsinə 569,6 milyon manat güzəştli kredit verildiyi açıqlanıb.
Sahibkarlığa Kömək Milli Fondu 2009-cu ildən fəaliyyət göstərir.
