Kubok Madridə getdi
İspaniyanın “Atletiko” klubu 3-cü dəfə UEFA Avropa Liqasının qalibi olub. Novator.az-ın məlumatına görə, 2017-2018 mövsümünün finalı mayın 16-sı Fransanın Lion şəhərində keçirilib. Mövsümün əsas oyununda “Atletiko” Fransanın “Marsel” komandasına heç bir şans verməyib – 3:0.
Madrid təmsilçisi 2010 və 2012-ci illərdə də turniri zəfərlə başa vurmuşdu.
“Atletiko” Avropa Liqasına Çempionlar Liqasından ələnib düşmüşdü. Komanda bu mövsüm Çempionlar Liqasının qrup mərhələsində Azərbaycanın “Qarabağ”, İtaliyanın “Roma”, İngiltərənin “Çelsi” komandalarına rəqib olub, üçüncü pillənin sahibi kimi Avropa Liqasına transfer edilib.
C qrupunda yarışan ağdamlılar “Çelsi”yə 0:4 və 0:6, “Roma”ya 1:2 və 0:1 hesabı ilə uduzub, “Atletiko” ilə xalları bölüb (0:0, 1:1).
Novator.az bildirir ki, 1971-ci ildən keçirilən, 2009-cu ilədək UEFA kuboku adlanmış Avropa Liqasında “Sevilya” (İspaniya) 5 dəfə, “Liverpul” (İngiltərə), “Yuventus”, “İnter” (İtaliya) 3 dəfə, “Tottenhem” (İngiltərə), “Feyenoord” (Hollandiya), “Borussiya” (Mönhenqladbah, Almaniya), “Höteborq” (İsveç), “Real” (İspaniya), “Parma” (İtaliya), “Portu” (Portuqaliya) 2 dəfə qalib olublar.
Almaniyanın “Şalke”, “Bavariya”, “Bayer”, “Ayntraxt” (Frankfurt), İngiltərənin “Çelsi”, “İpsviç”, “Mançester Yunayted”, Hollandiyanın PSV, “Ayaks”, Rusiyanın “Zenit”, SSKA, Ukraynanın “Şaxtyor”, İspaniyanın “Valensiya”, Türkiyənin “Qalatasaray”, İtaliyanın “Napoli”, Belçikanın “Anderlext” komandaları 1 yol uğur əldə ediblər.
