Yerevan merini qovmaq istəyirlər
Mayın 16-da bir qrup fəal Yerevan Şəhər Şurasının binasına daxil olaraq mer Taron Marqaryanın istefası tələbini irəli sürüb. Novator.az-ın məlumatına görə, onlar Taron Marqaryanı aprel hərəkatı zamanı müxalif qüvvələrə fiziki zorakılıq hərəkətlərinin təşkilində, bizneslə məşğul olmaqda, öz adamlarını rəhbər vəzifələrə yerləşdirməkdə, şəhərin ekologiyasına diqqət ayırmamaqda ittiham edir.
Taron Marqaryan 2011-ci ildən Yerevan meridir. Yerevan Şəhər Şurasına ötən ilin mayında keçirilmiş seçkini onun üzvü olduğu Respublika Partiyası udub. 65 yerlik şurada “Çıxış” bloku və Əriklər Ölkəsi Partiyası da təmsil olunur. Proporsional üsulla seçilən Şəhər Şurasında mandatların yarıdan çoxunu götürdüyü üçün Respublika Partiyasının siyahısına başçılıq edən Yerevan meri Taron Marqaryan postunu qoruyub.
“Çıxış” blokunun siyahısında Vətəndaş Sazişi Partiyasının lideri, indiki baş nazir Nikol Paşinyan, Əriklər Ölkəsi Partiyasının siyahısında Zarui Postancyan birinci olub.
Yerevan Şəhər Şurasının səlahiyyət müddəti 4 ildir.
Nikol Paşinyan mayın 8-dən baş nazirdir. 2008-2018-ci illərdə prezident postunu tutan Respublika Partiyasının sədri Serj Sərkisyan aprelin 17-də baş nazir kürsüsünə oturub, ancaq xalq etirazlarına görə aprelin 23-də istefa verməyə məcbur olub. Xalq etirazlarına Nikol Paşinyan başçılıq edib.
