Prezident Naxçıvana səfər edib
Prezident İlham Əliyev mayın 16-da Naxçıvan Muxtar Respublikasına səfər edib. Naxçıvan şəhərinin hava limanında dövlət başçısını Ali Məclisin sədri Vasif Talıbov, yerli hökumətin üzvləri qarşılayıb.
AZƏRTAC xəbər verir ki, İlham Əliyev Şərur şəhərinin və ətraf kəndlərin içməli su təchizatı və kanalizasiya sistemlərinin yenidən qurulması layihəsinin birinci mərhələsinin açılışında iştirak edib.
Layihə üzrə tikinti işlərinin icrasına 2012-ci ildən başlanılıb. Şərur şəhərinə, Mahmudkənd kəndinə və Zeyvə kəndinin bir hissəsinə su şəbəkəsi, Şərur şəhərinə kanalizasiya şəbəkəsi çəkilib və ev birləşmələri aparılıb. Bununla da Şərur şəhərində, Mahmudkənd kəndində və Zeyvə kəndinin bir hissəsində 13 min 500 nəfər Dünya Səhiyyə Təşkilatının standartlarına cavab verən içməli su ilə davamlı olaraq 24 saat təmin ediləcək.
Açılış mərasimindən sonra İlham Əliyev rayon ictimaiyyətinin nümayəndələri ilə görüşüb.
Prezident Naxçıvan şəhərində Təmizləyici Qurğular Kompleksinin, Qaraxanbəyli inzibati ərazi dairəsində 480 şagird yerlik 6 saylı tam orta məktəbin açılışlarına da qatılıb.
İlham Əliyev həmçinin Naxçıvan şəhər Qaraçuq ərazi dairəsində Əmiraslan Əliyev adına Sərhəd Dəstəsində yaradılan şəraitlə tanış olub, Naxçıvan Müəllimlər İnstitutunun yeni binasının açılışında iştirak edib.
Prezident Əlahiddə Ümumqoşun Ordusunun “N” saylı hərbi hissəsindəki Təlim-Tədris Mərkəzində yaradılan şəraitlə də tanış olub.
