Parisdə Qarabağ görüşü
Xarici işlər naziri Elmar Məmmədyarov mayın 15-i Parisdə ATƏT-in Minsk qrupunun həmsədrləri İqor Popov (Rusiya), Stefan Viskonti (Fransa), Endrü Skofer (ABŞ) və ATƏT sədrinin şəxsi nümayəndəsi Anjey Kasprşiklə görüşüb. Rəsmi məlumata görə, görüşdə Azərbaycan və Ermənistanda seçki proseslərinin başa çatdığı vurğulanaraq danışıqların intensiv davam etdirilməsinin vacibliyi qeyd olunub. Elmar Məmmədyarov Azərbaycanın münaqişənin tezliklə həlli üçün intensiv danışıqlara hazır olduğunu bəyan edib.
Görüşdə danışıqlar prosesinin irəliləməsi üçün Minsk qrupu həmsədrlərinin həyata keçirəcəyi tədbirlər, həmçinin regiondakı vəziyyət ətraflı müzakirə olunub.
APA bildirir ki, həmsədrlər görüşün yekunlarına dair bəyanat yayıblar. Bəyanata görə, görüşdə sülh prosesinin irəli aparılmasının mümkün variantları müzakirə edilib. Anjey Kasprşik görüş iştirakçılarına təmas xəttindəki vəziyyət barədə məlumat verib. Həmsədrlər Ermənistanın yeni rəhbərliyi ilə iyunda görüşəcəklərini bildiriblər.
Novator.az xatırladır ki, 1988-ci ilin fevralında Azərbaycanın Mardakert, Martuni, Hadrut, Şuşa, Əsgəran rayonları və Stepanakert şəhərindən ibarət Dağlıq Qarabağ Muxtar Vilayətinin Ermənistana verilməsi tələbi ilə separatçı hərəkat, hərbi təcavüz başlayıb. 1991-ci il sentyabrın 2-də ermənilər Dağlıq Qarabağı “müstəqil dövlət” elan edib, işğalçı müharibə alovlanıb. 1994-cü ildə atəşkəslə dayanan müharibədə Ermənistan Dağlıq Qarabağ vilayətini və onun ətrafındakı bölgələri (Laçın, Kəlbəcər, Qubadlı, Zəngilan rayonlarını tam, Ağdam, Füzuli, Cəbrayıl rayonlarını qismən) işğal edib.
Dağlıq Qarabağ münaqişəsinin dinc yolla tənzimlənməsi üçün 1992-ci ildə yaradılan ATƏT-in Minsk qrupunun 11 üzvü var: Rusiya, Fransa, ABŞ, Belarus, Almaniya, İtaliya, İsveç, Finlandiya, Türkiyə, Ermənistan, Azərbaycan.
Hazırda Dağlıq Qarabağ danışıqları Madrid prinsipləri əsasında aparılır. Minsk qrupu həmsədrlərinin – Rusiya, Fransa və ABŞ-ın 2007-ci ildə Madriddə irəli sürdüyü prinsiplər Dağlıq Qarabağ ətrafında olan rayonların mərhələlərlə Azərbaycanın nəzarətinə qaytarılmasını; Dağlıq Qarabağa aralıq statusun verilməsini; Ermənistanla Dağlıq Qarabağı birləşdirən dəhlizin yaradılmasını; gələcəkdə Dağlıq Qarabağın yekun statusunun referendumla müəyyənləşməsini; bütün məcburi köçkünlərin və qaçqınların öz əvvəlki yaşayış yerlərinə qayıtmaq hüququnu və sülhməramlı əməliyyatlar da daxil olmaqla beynəlxalq təhlükəsizlik təminatını nəzərdə tutur.
