Məhsul istehsalı 20,2 faiz artıb
Dövlət Statistika Komitəsi sosial-iqtisadi göstəriciləri açıqlayıb. Novator.az bildirir ki, rəsmi hesabata görə, 2018-ci ilin yanvar-aprel aylarında ölkədə 22 milyard 969 milyon manatlıq və ya əvvəlki ilin müvafiq dövrü ilə müqayisədə 1,2 faiz çox ümumi daxili məhsul (ÜDM) istehsal edilib. İqtisadiyyatın qeyri-neft sektorunda istehsal olunmuş əlavə dəyər 2,1 faiz artıb, neft sektorunda isə 0,1 faiz azalıb.
Əhalinin hər nəfərinə düşən ÜDM 2346 manata bərabər olub.
2017-ci ilin yanvar-aprel ayları ilə müqayisədə kənd təsərrüfatının ümumi məhsulunun 3,5 faiz, o cümlədən bitkiçilik məhsulları istehsalının 20,2 faiz, heyvandarlıq məhsulları istehsalının 2,6 faiz artdığı vurğulanır.
Nəqliyyat sektoruna gəlincə, dörd ayda yük daşınması 2017-ci ilin müvafiq dövrü ilə müqayisədə 0,5 faiz, sərnişin daşınması 1,6 faiz artıb.
Əvvəlki ilin ilk dörd ayı ilə müqayisədə göstərilmiş informasiya və rabitə xidmətlərinin həcmi dəyər ifadəsində 7,8 faiz artıb, bu sahədə əldə edilmiş gəlirin 80,9 faizi qeyri-dövlət sektorunun payına düşüb.
Dörd ayda əhalinin gəlirləri nominal ifadədə 9,2 faiz artaraq 16 milyard 272,8 milyon manata çatıb.
Yanvar-aprel aylarında dövlət büdcəsinə 6 milyard 619,9 milyon manat vəsait daxil olub, büdcədən 5 milyard 966 milyon manat vəsait xərclənib.
Aprelin 1-nə ölkənin bank və digər kredit təşkilatlarının kredit portfeli milli valyuta ekvivalentində 11 milyard 663,5 milyon manat təşkil edib. Ödəmə vaxtı keçmiş kreditlərin məbləği ümumi kredit portfelinin 14,7 faizinə bərabər olub.
Əhalinin banklardakı əmanətlərinin milli valyuta ekvivalentində məbləği aprel ayının 1-nə 7 milyard 657,2 milyon manat göstərilib.
