Süni yağ ölüm riskini 28% artırır
Dünya Səhiyyə Təşkilatı qida təhlükəsizliyi ilə bağlı yeni proqram təqdim edib. Novator.az-ın məlumatına görə, proqram 2023-cü ilə qədər qida sənayesində süni sintezli yağların istifadəsindən tam imtinanı nəzərdə tutur. Ekspertlər bununla hər il 500 min insanın ürək-damar xəstəliyindən xilas olacağını güman edir.
Hazırda hidrogenləşmiş yağların kartof qızartması, un məmulatları və digər qəlyanaltıların hazırlanmasında geniş istifadə olunduğu bildirilir. Belə yağlar ucuz olduğu və çox saxlana bildiyi üçün istehsalçılara sərfəlidir. Mütəxəssislər isə belə yağların insan sağlamlığına zərərli olduğunu qeyd edir. Hidrogenləşmiş yağların qidalarda istifadəsi ürək-damar xəstəliyi riskini 21%, ölüm riskini isə 28% artırır.
Dünya Səhiyyə Təşkilatının yeni proqramında süni yağların təbii yağlarla əvəzlənməsi nəzərdə tutulur. Ekspertlər yeniliyin qida məhsullarının təhlükəsizliyini artıracağını düşünür. Bir sıra ölkələr qida sənayesində süni yağların istifadəsinə məhdudiyyət tətbiq edib. ABŞ isə belə yağlara üç il əvvəl tam qadağa qoyub.
Səidə Hüseynova
