Qəzza qırğını

15 May 2018
comments
Səidə Hüseynova
Posted in Xəbər

Fələstinin Qəzza bölgəsində İsrail ordusu ilə toqquşmalar 59 nəfərin ölümü ilə nəticələnib. Toqquşmalar mayın 14-də, ABŞ-ın İsraildəki səfirliyi Tel-Əvivdən Yerusəlimə köçürülən gün baş verib. 35 min fələstinli həmin gün Qəzza bölgəsinin İsraillə sərhədində etiraz aksiyası keçirib, ordu bunu odlu silahla qarşılayıb.

Fələstində üç günlük matəm elan olunub. Türkiyə də üç günlük matəm elan edib. Hazırda İslam Əməkdaşlıq Təşkilatına sədrlik edən bu ölkə qurumun fövqəladə toplantısını çağırmaq təşəbbüsü irəli sürüb.

Novator.az xatırladır ki, 1947-ci ildə BMT Fələstin torpaqlarının bölünməsinə qərar verib. Həmin qərara əsasən, ərazidə İsrail və Fələstin dövlətləri qurulmalı, Yerusəlim (Qüds) beynəlxalq nəzarətə verilməli idi.

1948-ci ildə qurulan İsrail az sonra Yerusəlimi özünün paytaxtı elan edib, BMT-nin Fələstinə ayırdığı ərazilərin yarıya qədərini tutub.

1967-ci ildə İsrail Qüdsün şərq hissəsini, eyni zamanda İordan çayının qərb sahilindəki Fələstin ərazilərini işğal edib.

1988-ci ildə Fələstin müstəqil dövlət elan olunub.

2012-ci ildə BMT Fələstinə ərazisi işğal olunmuş müstəqil dövlət statusu verib. Bu o deməkdir ki, İsrail 1967-ci ildə tutduğu Şərqi Qüdsdən və İordan çayının qərb sahilindən çıxmalıdır.

1995-ci ildə ABŞ Konqresi ölkənin İsraildəki səfirliyinin Tel-Əvivdən Yerusəlimə köçürülməsi barədə qanun qəbul edib. Amma Donald Trampdan əvvəlki prezidentlər bu qanunun icrasını təxirə salıblar.

2017-ci il dekabrın 6-da Donald Tramp Yerusəlimi İsrailin paytaxtı kimi tanıdığını bəyan edərək ölkəsinin səfirliyini Tel-Əvivdən həmin şəhərə köçürmək qərarı imzalayıb.

Dekabrın 21-də BMT Baş Məclisində Qüdsün İsrailin paytaxtı kimi tanınması qərarını rədd edən qətnamə çıxarılıb.