Aprelin miqrasiya hesabatı
Aprel ayında Dövlət Miqrasiya Xidməti Azərbaycanda miqrasiya qanunvericiliyinin tələblərinin pozulmasına görə 1735 qərar qəbul edib. Rəsmi məlumata əsasən, qərarların 1194-ü cərimə tətbiqini nəzərdə tutur. 489 qərarda ölkə ərazisinə girişə məhdudiyyət qoyulur. Həmin qərarlar əsasında 436 nəfər ölkədən çıxarılıb.
Qalan qərarlar müvəqqəti və daimi yaşamaq üçün sənədin yeni sənədlə əvəz olunması, qeydiyyat məsələləri ilə bağlıdır.
Ötən ay Dövlət Miqrasiya Xidmətinə əcnəbilər və vətəndaşlığı olmayan şəxslərdən ölkədə müvəqqəti olma müddətinin uzadılması, müvəqqəti və daimi yaşamaq üçün icazələrin alınması, vətəndaşlığa qəbul, bərpa, vətəndaşlıqdan çıxma, eləcə də vətəndaşlıq mənsubiyyətinin və qaçqın statusunun müəyyənləşdirilməsi, əmək fəaliyyətinin həyata keçirilməsi üçün iş icazələrinin alınması və mövcud iş icazələrinin müddətlərinin uzadılması üçün 7366 müraciət daxil olub.
