Hansı məhsullar adamı qocaldır?
Bəzi qida məhsulları insan sümüyünün və dərisinin qocalmasına səbəb olur. Novator.az-ın məlumatına görə, bir qrup alim bu qənaətdədir. Qida problemləri ilə məşğul olan mütəxəssislər hesab edir ki, şəkər, süd və kolbasa qocalma prosesini xeyli sürətləndirə bilər.
Şəkər tərkibində kollagenin (bütün orqanlar üçün birləşdirici toxuma rolunu oynayan xüsusi zülal) qlükozalaşması prosesini başladan molekullara görə təhlükəlidir. Kollagen dərinin elastikliyinə və hamarlığına cavabdehdir. Ona görə də alimlər hesab edir ki, qida rasionunda şəkər bolluğu qırışlar əmələ gətirir.
Mütəxəssislər kolbasa məmulatlarını tərkibində fosfat maddəsi olduğuna görə dəri üçün təhlükəli hesab edir. Fosfat kalsiumla birləşərək damar və arteriya divarlarının vəziyyətinə mənfi təsir göstərir.
Alimlər südü də dərini korlayan qida məhsulları siyahısına salıb. Südün tərkibindəki laktozanın (süd şəkəri) bir komponenti oksidləşmə yaradaraq orqanizmdə iltihabın yaranmasına səbəb olur. İltihab isə sümük sisteminin vəziyyətinə mənfi təsir edir.
Səidə Hüseynova
