“Avroviziya” yarışmalarının neçə qalibi var?
Mayın 8-dən 12-dək Portuqaliyanın paytaxtı Lissabonda keçirilmiş “Avroviziya 2018” mahnı müsabiqəsi israilli müğənni Netta Barzilayın qələbəsi ilə başa çatdı. Novator.az bildirir ki, bu, İsrailin “Avroviziya”larda 4-cü zəfəridir.
İctimai teleradioları cəmləşdirən Avropa Yayım Birliyinin 1956-cı ildən keçirdiyi “Avroviziya”larda indiyəcən 27 ölkə birincilik əldə edib. 1969-cu ildə qələbə eyni vaxtda dörd ölkəyə (İspaniya, Böyük Britaniya, Fransa və Niderland) verilib.
63 dəfə keçirilmiş yarışda hamıdan çox İrlandiya uğur qazanıb. Bu ölkə 7 “Avroviziya”da birinci olub.
İsveç 6 müsabiqədən qalib çıxıb.
Fransa, Lüksemburq, Böyük Britaniya 5 dəfə “Avroviziya” zəfəri yaşayıblar.
Niderland və İsrail 4 yarışmada qalib gəlib.
Danimarka və Norveçin 3 qələbəsi var.
Avstriya, Almaniya, İtaliya, İspaniya, İsveçrə, Ukrayna “Avroviziya”nın ilk pilləsində 2 dəfə yer alıblar.
Müsabiqəyə 11 dəfə qatılmış Azərbaycanın 1 qələbəsi var.
Belçika, Estoniya, Finlandiya, Yunanıstan, Latviya, Monako, Rusiya, Serbiya, Türkiyə, Portuqaliya da 1 dəfə “Avroviziya” qalibi olublar.
Tarixə qovuşmuş Yuqoslaviya da 1 uğur əldə edib.
