Ermənistana yeni müdafiə naziri gəlir
Ermənistanın yeni baş naziri Nikol Paşinyan mayın 11-də keçirdiyi ilk hökumət iclasında müdafiə naziri postuna namizədinin adını açıqlayıb. Novator.az-ın məlumatına görə, Nikol Paşinyan müdafiə naziri vəzifəsinə fövqəladə hallar naziri səlahiyyətlərinin icraçısı David Tonoyanın gətiriləcəyini deyib.
Ermənistanda hökumət üzvlərini baş nazirin təqdimatı ilə prezident təyin edir.
David Tonoyan 1967-ci ildə Qazaxıstanda doğulub. Yerevan Dövlət Universitetini, Moskva Hərbi Diplomatik Akademiyasını bitirib. Ermənistanın daxili işlər orqanlarında, Hərbi Polisdə, Müdafiə Nazirliyində xidmət edib. Ölkənin Silahlı Qüvvələrinin NATO-dakı nümayəndəsi, müdafiə nazirinin birinci müavini olub. 2017-ci il fevralın 6-dan fövqəladə hallar naziridir.
2016-cı il oktyabrın 3-dən müdafiə naziri postunu 43 yaşlı Vigen Sərkisyan tutur.
Vigen Sərkisyan Sankt-Peterburq Mülki Xidmət Akademiyasını, Yerevan Dövlət Universitetini və Filetser Hüquq və Diplomatiya Məktəbini (ABŞ) bitirib.
1995-1998-ci illərdə Ermənistan parlamenti sədrinin köməkçisi, 2003-2009-cu illərdə Ermənistan prezidentinin köməkçisi, 2009-2011-ci illərdə Prezident Administrasiyası rəhbərinin müavini olub. 2011-ci ildən Prezident Administrasiyasına rəhbərlik edib.
2000-2003-cü illərdə müdafiə nazirinin referenti kimi hərbi xidmət keçib.
