Respublikaçı idarə rəisi istefa verdi
Ermənistan hökumətinə daxil olan Dövlət Əmlakı İdarəsinin rəisi Arman Saakyan mayın 10-da istefa verib. 2011-ci ildən Dövlət Əmlakı İdarəsinin rəisi postunu tutan 44 yaşlı Arman Saakyan parlamentin sabiq sədri Qalust Saakyanın oğlu, keçmiş baş nazir Serj Sərkisyanın sədrlik etdiyi Ermənistan Respublika Partiyasının üzvüdür.
Mayın 8-dən ölkəyə Vətəndaş Sazişi Partiyasının sədri Nikol Paşinyan baş nazirlik edir. Qanunla hökumət baş nazirin birinci müavinindən, 2 müavinindən və 18 nazirdən ibarətdir. Kabinetin nəzdində Milli Təhlükəsizlik Xidməti, Ermənistan Polisi, Şəhərsalma Komitəsi, Mülki Aviasiya Baş İdarəsi, Daşınmaz Əmlakın Kadastrı Komitəsi, Nüvə Təhlükəsizliyi Komitəsi, Dövlət Əmlakı İdarəsi, Dövlət Gəlirləri İdarəsi də var. Təyinatları baş nazirin təqdimatı ilə prezident etməlidir. Hələlik heç bir təyinat olmayıb.
Mayın 10-da Nikol Paşinyan prezident Armen Sərkisyana təqdimat göndərərək Georgi Kutoyanın Milli Təhlükəsizlik Xidmətinin direktoru, Vladimir Qasparyanın Ermənistan Polisinin rəisi postlarından çıxarılmasını istəyib.
Vladimir Qasparyan Ermənistan Polisinin rəisi postunda 2011-ci ildən çalışır, Georgi Kutoyan isə 2016-cı ildən Milli Təhlükəsizlik Xidmətinin direktorudur.
