Arıqlamaq üçün nə yeməli?
Britaniyalı alimlər artıq çəkidən azad olmaq yönündə yeni tədqiqat aparıb. Novator.az-ın məlumatına görə, tədqiqat göstərib ki, çəki azaltmaq üçün enerji sıxlığı aşağı olan kartofdan, xəmir xörəklərindən və düyüdən istifadə etmək məsləhətdir. Bu ərzaqların doyumlu olduğu üçün zərərli qidaya və qeyri-sağlam qəlyanaltına meyli azaltdığı bildirilir.
Alimlər meyvə-tərəvəzin, yağsız ətin, balığın, yumurtanın, paxlalı məhsulların da çəki atmaq üçün eyni təsiri olduğu qənaətindədir. Bu məhsullarda kalorinin az olduğu vurğulanır.
Lids Universitetinin alimləri qeyd edir ki, insanların çoxu yemək arası yaranan aclıq hissinə görə pəhrizi dayandırır, enerji sıxlığı aşağı olan məhsullarda kalori az olduğu üçün acmaq problemi aradan qalxır.
Alimlər tədqiqata artıq çəkili 37 qadını cəlb ediblər. Onlara 14 gün ərzində enerji sıxlığı aşağı olan məhsullarla qidalanmaq tapşırılıb. Qadınlar 2 həftə ərzində orta hesabla 5,5 kiloqram arıqlayıblar.
41 qadından ibarət daha bir qrup isə qida rasionunu 1400 kalori azaldıb. Bu qadınlar orta hesabla 3,3 kiloqram çəki atıblar. Analiz göstərib ki, səhər və günorta yeməyi zamanı enerji sıxlığı aşağı olan məhsullarla qidalanan könüllülər 1057 az kalori qəbul etmiş olublar və acmaqdan daha az şikayətləniblər.
Səidə Hüseynova
