Paşinyan Qarabağda
Ermənistanın baş naziri Nikol Paşinyan mayın 9-da Azərbaycanın Dağlıq Qarabağ bölgəsinə gəlib. Novator.az-ın məlumatına görə, Nikol Paşinyan Xankəndidə keçirilən bayram yürüşünə qatılıb. Onu Ermənistan Silahlı Qüvvələri Baş Qərargahının rəisi Movses Akopyan, Dağlıq Qarabağ rejiminin başçısı Bako Saakyan və başqa rəsmilər müşayiət edib.
Mayın 9-u ermənilər Şuşanın ələ keçirilməsinin 26-cı ilini qeyd eləyir. Nikol Paşinyan bu şəhərə də baş çəkib.
Baş nazirin Bako Saakyanla birgə hərbi müşavirəyə qatıldığı da xəbər verilir.
42 yaşlı Nikol Paşinyan mayın 8-dən baş nazirdir. 2012-ci ildən parlamentin deputatı idi. Vətəndaş Sazişi Partiyasının sədridir.
2008-2018-ci illərdə prezident postunu tutan Dağlıq Qarabağ əsilli Serj Sərkisyan aprelin 17-də baş nazir kürsüsünə oturub, ancaq xalq etirazlarına görə aprelin 23-də istefa verməyə məcbur olub. Xalq etirazlarına Nikol Paşinyan başçılıq edib.
1988-ci il fevralında Azərbaycanın Əsgəran, Hadrut, Mardakert, Martuni, Şuşa rayonları və Stepanakert şəhərindən ibarət Dağlıq Qarabağ Muxtar Vilayətinin Ermənistana verilməsi tələbi ilə separatçı hərəkat, hərbi təcavüz başlayıb. 1991-ci il sentyabrın 2-də ermənilər Dağlıq Qarabağı “müstəqil dövlət” elan edib, işğalçı müharibə alovlanıb, Dağlıq Qarabağda azərbaycanlıların yaşadığı kəndlər, eləcə də Xocalı şəhəri ermənilərin əlinə keçib.
1992-ci il mayın 8-9-da Şuşa şəhərinin işğalı ilə Azərbaycan Dağlıq Qarabağa nəzarəti tam itirib.
Müharibənin sonrakı mərhələsində Dağlıq Qarabağ ətrafındakı Laçın, Kəlbəcər, Ağdam, Füzuli, Cəbrayıl, Qubadlı, Zəngilan rayonları işğal edilib.
1994-cü il mayın 12-də Azərbaycan və Ermənistanın müdafiə nazirləri, eləcə də Dağlıq Qarabağdakı erməni silahlı birləşmələrinin komandanı Moskvada atəşkəs sazişi imzalayıb.
Dağlıq Qarabağ münaqişəsinin dinc yolla tənzimləməsi üçün 1992-ci ildə yaradılan ATƏT-in Minsk qrupunun 11 üzvü var: Rusiya, Fransa, ABŞ (hər üçü həmsədr), Belarus, Almaniya, İtaliya, İsveç, Finlandiya, Türkiyə, Ermənistan, Azərbaycan.
