İlk yarımfinalı kimlər adladı?
Portuqaliyanın paytaxtı Lissabonda keçirilən “Avroviziya 2018” mahnı müsabiqəsi Azərbaycan üçün uğursuz olub. Mayın 8-də baş tutan ilk yarımfinala qatılan təmsilçi Aysel Məmmədova finala adlaya bilməyərək ələnib.
Novator.az bildirir ki, bu, 11 dəfə “Avroviziya”ya qatılan Azərbaycanın ən pis nəticəsidir. Azərbaycan Avropa Yayım Birliyinin 1956-cı ildən keçirdiyi “Avroviziya” musiqi yarışına 2008-ci ildən qatılır. 2008-ci ildə Elnur Hüseynov və Samir Cavadzadə 8-ci, 2009-cu ildə Aysel Teymurzadə və Araş 3-cü, 2010-cu ildə Səfurə Əlizadə 5-ci, 2011-ci ildə Nigar Camal və Eldar Qasımov 1-ci, 2012-ci ildə Səbinə Babayeva 4-cü, 2013-cü ildə Fərid Məmmədov 2-ci, 2014-cü ildə Dilarə Kazımova 22-ci, 2015-ci ildə Elnur Hüseynov 12-ci, 2016-cı ildə Səmra Rəhimli 17-ci, 2017-ci ildə Diana Hacıyeva 14-cü yeri tutub.
Aysel Məmmədova 1989-cu ildə Bakı şəhərində anadan olub. 2006-cı ildə Bülbül adına Orta İxtisas Musiqi Məktəbini, 2010-cu ildə Üzeyir Hacıbəyli adına Bakı Musiqi Akademiyasını bitirib. Xarici musiqiçilərdən özəl dərslər alıb, müxtəlif beynəlxalq caz festivallarında iştirak edib. Pianoçu, vokalist və bəstəkardır.
“Avroviziya 2018”in ilk yarımfinalında 19 ölkə iştirak edib. Sezar Sempson (Avstriya), Elina Neçayeva (Estoniya), Eleni Fureyra (Kipr), Yeva Zasimauskayte (Litva), Netta Barzilay (İsrail), Cozef Nikolas (Çexiya), “Equinox” qrupu (Bolqarıstan), Yevqent Buşpepa (Albaniya), Saara Aalt (Finlandiya), Rayan O’Şonessi (İrlandiya) finala keçiblər.
