Qarabağlıların dövranı başa çatdı
İcevan şəhərindən olan Nikol Paşinyanın mayın 8-də baş nazir kürsüsünə oturması ilə qarabağlıların Ermənistanda 20 illik hökmranlığına son qoyuldu.
Azərbaycanın Dağlıq Qarabağ bölgəsində doğulmuş şəxslər 1998-ci ildən Ermənistana rəhbərlik edirdilər.
Novator.az bildirir ki, 1991-ci ildə müstəqillik əldə edəndə Ermənistanda prezident postunu Suriyada doğulmuş Levon Ter-Petrosyan tuturdu. 1997-ci ildə o, Dağlıq Qarabağda doğulmuş Robert Köçəryanı baş nazir postuna gətirib.
Robert Köçəryan 1988-ci ildə başlayan işğalçı Qarabağ müharibəsinin rəhbərlərindən biridir, 1992-1997-ci illərdə separatçı rejimin başında dayanıb.
1998-ci ilin fevralında Levon Ter-Petrosyan istefa verib. Baş nazir kimi prezident səlahiyyətlərini icra etməyə başlayan Robert Köçəryan 1998 və 2003-cü illərdə dövlət başçısı seçilib.
2008-ci ildə Robert Köçəryanı Serj Sərkisyan əvəzləyib.
Dağlıq Qarabağda doğulan Serj Sərkisyan işğalçı müharibənin liderlərindən biridir. 1989-1993-cü illərdə Qarabağdakı separatçı hərbi qüvvələrin komandanı olub. 1993-cü ildən Ermənistanda müdafiə naziri postunu (iki dəfə) tutub, daxili işlər, milli təhlükəsizlik orqanlarına, Prezident Aparatına rəhbərlik edib.
2007-ci ildə baş nazir kürsüsünə keçən Serj Sərkisyan 2008 və 2013-cü illərdə prezident seçilib.
2018-ci il aprelin 9-da prezident səlahiyyətləri başa çatan Serj Sərkisyan aprelin 17-də baş nazir kürsüsünə oturub, ancaq xalq etirazlarına görə aprelin 23-də istefa verib.
Onun istefasından sonra Ermənistan hökumətinə baş nazirin birinci müavini Karen Karapetyan müvəqqəti rəhbərlik edib. Dağlıq Qarabağ bölgəsində doğulan Karen Karapetyan 2016-cı ildə baş nazir təyin edilmiş, 2018-ci il aprelin 18-də baş nazirin birinci müavini vəzifəsinə keçirilmişdi.
2016-cı ildən Ermənistan Silahlı Qüvvələri Baş Qərargahının rəisi vəzifəsini Dağlıq Qarabağ bölgəsində doğulmuş general-polkovnik Movses Akopyan tutur.
Dağlıq Qarabağda doğulmuş Arkadi Qukasyan 2009-cu ildən Ermənistanda xüsusi tapşırıqlar üzrə səfirdir.
Dağlıq Qarabağ bölgəsində doğulmuş daha bir şəxs – Seyran Ohanyan 2008-2016-cı illərdə Ermənistanın müdafiə naziri vəzifəsində çalışıb.
Novator.az xatırladır ki, 2018-ci il aprelin 9-dan Ermənistana yerevanlı Armen Sərkisyan prezidentlik edir. O, 2018-ci il martın 2-si parlamentdə dövlət başçısı seçilib.
