Paytaxtda orta maaş 745 manatı ötüb
Bakı Şəhər Statistika İdarəsi paytaxtın sosial-iqtisadi göstəricilərini açıqlayıb. Novator.az-ın məlumatına görə, rəsmi hesabatda bildirilir ki, 2018-ci ilin yanvar-mart aylarında sənayedə istehsalın və xidmətlərin həcmi əvvəlki ilin müvafiq dövrü ilə müqayisədə 1,3 faiz artaraq 9,6 milyard manata çatıb. Sənaye məhsulunun 84,3 faizi mədən sektorunda istehsal olunub. Qeyri-dövlət sektorunun payı 83,6 faiz göstərilir.
Qeyd olunur ki, yanvar-mart aylarında şəhərin iqtisadi və sosial sahələrinin inkişafı üçün əsas kapitala 2 milyard 61,4 milyon manat məbləğində vəsait yönəldilib. Bu, əvvəlki ilin müvafiq dövrü ilə müqayisədə 25 faiz azdır. Ümumi vəsaitin 69,5 faizi qeyri-dövlət sektorunun, 30,5 faizi dövlət sektorunun payına düşüb.
2018-ci ilin birinci rübündə ticarət dövriyyəsinin həcmi 2017-ci ilin yanvar-mart ayları ilə müqayisədə 3,2 faiz, ictimai iaşə dövriyyəsi real ifadədə 3,6 faiz, əhaliyə göstərilən ödənişli xidmətlərin dəyəri 0,6 faiz artıb.
Bakı Şəhər Statistika İdarəsi qeyd edir ki, 2018-ci ilin yanvar-fevral aylarında işçilərin orta aylıq nominal əməkhaqqı əvvəlki ilin müvafiq dövrünə nisbətən 1,1 faiz artaraq 745,7 manat olub.
