Hökumətdə yeni təyinat
Prezident İlham Əliyev sərəncam imzalayaraq Kamran İmanovu Əqli Mülkiyyət Agentliyinin İdarə Heyətinin sədri təyin edib. Novator.az bildirir ki, bu mərkəzi icra hakimiyyəti orqanı aprelin 20-də Müəllif Hüquqları Agentliyi ilə Patent və Əmtəə Nişanları Mərkəzinin birləşməsindən yaradılıb. Ləğv edilmiş Standartlaşdırma, Metrologiya və Patent üzrə Dövlət Komitəsinin sənaye mülkiyyəti obyektlərinin mühafizəsi sahəsində səlahiyyətləri Əqli Mülkiyyət Agentliyinə verilib.
1946-cı il təvəllüdlü Kamran İmanov 1993-1995-ci illərdə Tələbə Qəbulu üzrə Dövlət Komissiyasının sədri olub, sonra Müəllif Hüquqları Agentliyinə və Nazirlər Kabineti yanında “İçərişəhər” Dövlət Tarix-Memarlıq Qoruğu İdarəsinə başçılıq edib.
2008-ci ildə yenidən Müəllif Hüquqları Agentliyinin sədri idi.
2016-cı ildə Kamran İmanov müəllif hüquqlarının qorunması sahəsində xidmətlərinə görə “Şöhrət” ordeni ilə təltif edilib.
İlham Əliyevin dördüncü dəfə prezident seçilməsindən sonra formalaşdırılan Nazirlər Kabineti 36 qurumdan (18 nazirlik, 8 komitə, 5 xidmət, 4 agentlik, 1 idarə) ibarətdir. Baş nazir və onun müavinləri ilə birgə Nazirlər Kabinetinin 39 üzvü var. Antiinhisar və İstehlak Bazarına Nəzarət Dövlət Agentliyinə rəhbər təyin olunmayıb. Milli Arxiv İdarəsinin rəisi səlahiyyətlərini isə əvvəlki rəis Ataxan Paşayev icra edir.
