Putinin dördüncü müddəti, yeni 6 ili başladı
Rusiya prezidenti Vladimir Putin mayın 7-də and içərək yeni səlahiyyətlərinin icrasına başlayıb. Novator.az-ın məlumatına görə, Moskvada, Böyük Kreml sarayında keçirilən andiçmə mərasiminə 5 mindən çox adam qatılıb.
Martın 18-də 8 namizədin iştirakı ilə keçirilmiş prezident seçkisində Vladimir Putin 76,7% səslə qalib gəlib. Bu, Vladimir Putinin prezident seçkilərində dördüncü qələbəsi olub.
Vladimir Putin 1952-ci il oktyabrın 7-də Leninqrad (Sankt-Peterburq) şəhərində doğulub. Leninqrad Dövlət Universitetinin hüquq fakültəsini və DTK-nın Moskva Ali Məktəbini bitirib. 1975-1990-cı illərdə təhlükəsizlik orqanlarında çalışıb.
1990-cı ildən Vladimir Putin əvvəl Leninqrad Dövlət Universiteti rektorunun köməkçisi, sonra Leninqrad Şəhər Soveti sədrinin müşaviri postlarını tutub.
1991-ci ildən Sankt-Peterburq meriyasında çalışıb, 1994-cü ildən Sankt-Peterburq hökuməti sədrinin birinci müavini olub.
Vladimir Putin 1996-cı ildən Rusiyanın ali hakimiyyət orqanlarında işləyib, prezidentin işlər müdirinin müavini, Prezident Administrasiyası rəhbərinin birinci müavini, Federal Təhlükəsizlik Xidmətinin direktoru, Təhlükəsizlik Şurasının katibi olub.
1999-cu il avqustun 16-da baş nazir təyin edilib. 1999-cu il dekabrın 31-dən həmçinin prezident vəzifəsini icra edib. 2000-ci ildə prezident seçilib. 2004-cü il seçkisində bu postu əlində saxlayıb.
2008-ci ilin may ayından Rusiyanın baş naziri olub. 2012-ci ildə yenidən prezident seçilib.
Rusiyada prezidentin səlahiyyət müddəti 6 ildir.
