Medvedyev komandası istefada
Rusiyada prezident Vladimir Putinin yeni 6 illik hakimiyyət dönəmi başlayıb. Martın 18-də yenidən dövlət başçısı seçilmiş Vladimir Putin mayın 7-də and içərək səlahiyyətlərinin icrasına başlayıb. Konstitusiyanın tələbinə əsasən, Rusiya hökuməti dərhal istefaya gedib.
Novator.az bildirir ki, Rusiya hökuməti baş nazirdən, baş nazirin birinci müavinindən, baş nazirin 8 müavinindən, 22 nazirdən ibarətdir. Hökumətin sədrini – baş naziri prezident parlamentin aşağı palatası olan Dövlət Dumasının razılığı ilə vəzifəyə təyin edəcək. Vladimir Putin baş nazir postuna 2012-ci ildən hökumətə rəhbərlik edən Dmitri Medvedyevi təqdim edib.
1965-ci ildə anadan olan Dmitri Medvedyev 1987-ci ildə Leninqrad Dövlət Universitetinin hüquq fakültəsini, 1990-cı ildə aspiranturanı bitirib. 1990-1999-cu illərdə təhsil aldığı universitetdə dərs deyib, həmçinin 1995-ci ilədək Leninqrad Şəhər Soveti sədrinin müşaviri və Sankt-Peterburq meriyasının xarici əlaqələr komitəsinin eksperti işləyib.
1999-cu ildə Rusiya Federasiyası hökuməti aparatının rəhbərinin müavini, 2000-ci ildə isə birinci müavini olan Dmitri Medvedyev 2000-2003-ci illərdə “Qazprom”da çalışıb (Direktorlar Şurasının sədr müavini, sədri). 2003-cü ilin oktyabr ayından 2005-ci ilin noyabr ayına qədər Prezident Administrasiyasına rəhbərlik edib. 2005-ci ilin noyabrından Rusiya baş nazirinin birinci müavini olub, daha sonra baş nazir kürsüsünə gətirilib.
2008-2012-ci illərdə Rusiya prezidenti olub.
Dmitri Medvedyevin sədrlik etdiyi hakim Vahid Rusiya Partiyası 450 yerlik Dövlət Dumasında 340-dan çox mandata sahibdir.
