Dövlət komitəsi hesabat verir
Əmlak Məsələləri Dövlət Komitəsində 2018-ci ilin yanvar-mart aylarında görülmüş işlərə dair müşavirə keçirilib. Mayın 7-də yayılan rəsmi məlumata görə, müşavirədə qeyd olunub ki, üç ayda dövlət əmlakının özəlləşdirilməsi ilə bağlı 52 hərrac baş tutub, 377 dövlət əmlakı, o cümlədən torpaq sahələri və nəqliyyat vasitələri özəlləşdirilib.
İnvestisiya müsabiqələri vasitəsilə özəlləşdirilmiş müəssisələr üzrə dövlət büdcəsinə 67 milyon manat vəsaitin daxil olduğu, 1,1 milyard ABŞ dolları həcmində investisiya qoyulduğu, 17 min 257 yeni iş yeri yaradıldığı bildirilir.
Hesabata görə, ilk rübdə torpaqlardan təyinatına uyğun və səmərəli istifadə, torpaqların əsassız zəbt olunması ilə bağlı 141 hal üzrə inzibati protokollar tərtib edilib.
Kənd təsərrüfatı məqsədi ilə (əkinçilik və heyvandarlıq) 18 min hektar torpaq sahəsinin icarəsinə müsbət rəy verilib. 1603 hektar bələdiyyə torpağı müsabiqə və ya hərraclar vasitəsilə icarəyə götürülüb.
2018-ci ilin ilk rübündə ölkə üzrə 50 minə yaxın daşınmaz əmlak obyekti üzərində mülkiyyət hüquqları qeydiyyata alınıb. Bu, ötən ilin eyni dövrü ilə müqayisədə 14,5 faiz çoxdur. Aparılan ilkin qeydiyyat isə ötən ilin eyni dövrü ilə müqayisədə 13,7 faiz artıb.
