Devalvasiyadan sonra…
İki aydır Mərkəzi Bank ABŞ dollarının kursunu dəyişmir: rəsmi qiymət martın 7-dən 1,7 manatdır. Novator.az-ın məlumatına görə, bu, manatın devalvasiyaya uğradığı 21 fevral 2015-ci ildən bəri ən uzun sürən rəsmi məzənnədir.
2015-ci il fevralın 20-də dollar banklara 0,7862 manata satılıb. Bir gün sonra Mərkəzi Bank kəskin kurs dəyişikliyinə qərar verib və rəsmi qiymət 1,05 manata yüksəlib.
2015-ci ilin martı 1,0496, apreli 1,0485, mayı 1,0482, iyunu 1,0494, iyulu 1,0485, avqustu 1,0493, sentyabrı 1,0479, oktyabrı 1,0485, noyabrı 1,0491, dekabrı 1,0513 manatla start götürüb.
Dekabrın 21-də ikinci devalvasiya baş verib, rəsmi kurs 1,55 manata qalxıb.
2016-cı il 1,5610 manatla başlayıb, 1,7707 manatla sona çatıb.
2017-ci ilin fevralında ilk devalvasiyadan sonra ən yuxarı rəsmi qiymət qeydə alınıb: 1,92 manat. Dekabrın 13-dən 2018-ci il martın 7-dək isə 1,7001 manat rəsmi məzənnə qüvvədə olub.
Ötən il Dövlət Neft Fondu Mərkəzi Bankın keçirdiyi valyuta hərraclarında 3 milyard 598 milyon dollar satıb. 2018-ci ilin dörd ayı ərzində satılan valyutanın həcmi isə 2 milyard 112,8 milyon dollar olub. Yanvarın hərraclarında fonddan 299,1 milyon dollar, fevralın hərraclarında 364,1 milyon dollar, martın hərraclarında 647 milyon dollar, aprelin hərraclarında 802,6 milyon dollar məbləğində vəsait alınıb.
Mərkəzi Bankın hesabatına görə, mayın 1-nə valyuta ehtiyatının həcmi 5 milyard 465,8 milyon dollar olub.
