Avropa meydanlarında yeniliklər
Ötən həftəsonu Avropanın daha iki önəmli futbol ölkəsində milli çempionatın qalibi bəlli olub. Novator.az-ın məlumatına görə, sona bir tur qalmış Portuqaliya çempionatında “Portu”nun, Rusiya çempionatında “Lokomotiv”in (Moskva) qızıl medalları rəsmiləşib.
İngiltərədə “Mançester Siti”, Fransada PSJ, Almaniyada “Bavariya”, İspaniyada “Barselona”, Hollandiyada PSV, Şotlandiyada “Seltik” çempionluğu daha əvvəl təmin edib.
İtaliya çempionatında 36 tur arxada qalıb. Lider “Yuventus”un 91, onu təqib edən “Napoli”nin 85 xalı var.
Türkiyə çempionatında “Qalatasaray”, Ukrayna çempionatında “Şaxtyor” liderdir.
2018-2019 mövsümündə UEFA Çempionlar Liqasında yarışacaq klubların sayı artıb. İspaniyanın “Barselona”, “Atletiko”, “Real”, “Valensiya”, Almaniyanın “Bavariya”, “Şalke”, İngiltərənin “Mançester Siti”, “Mançester Yunayted”, İtaliyanın “Yuventus”, “Napoli”, Fransanın PSJ, Rusiyanın “Lokomotiv” (Moskva), Portuqaliyanın “Portu” komandalarının turnirə qrupdan başlaması dəqiqləşib.
“Ayaks”, PSV (Hollandiya), PAOK, AEK (Yunanıstan), “Bazel” , “Yanq Boyz” (İsveçrə), “Zalsburq” (Avstriya), “Spartak” (Moskva, Rusiya), “Şaxtyor”, “Dinamo” (Ukrayna), “Viktoriya” (Çexiya) komandaları da Çempionlar Liqasına vəsiqə alıb.
Azərbaycanın “Qarabağ” komandası turnirə 1-ci mərhələdən başlayacaq. “Qarabağ” həmin mərhələnin güclülər səbətində yer alır və onun bəzi potensial rəqibləri məlumdur: “Spartak” (Slovakiya), “Valletta” (Malta), “Vikinqur” (Farer adaları), “Kruzeyders” (Şimali İrlandiya), “Sutyeska” (Monteneqro), “Suduva” (Litva), “Kork Siti” (İrlandiya), “Spartaks” (Latviya), “Valyur” (İslandiya), “Flora” (Estoniya), “Torpedo” (Gürcüstan).
“Zrinski” (Bosniya), “Şkendiya” (Makedoniya) komandaları da potensial rəqiblər sırasında ola bilər.
Ağdam klubu ilə eyni səbətdə “Ludoqorets” (Bolqarıstan), “Seltik” (Şotlandiya), “Astana” (Qazaxıstan), BATE (Belarus), “Şerif” (Moldova), “Malmö” (İsveç), “Srvena Zvezda” (Serbiya), “Rusenborq” (Norveç), HİK (Finlandiya), “Nyu Sents” (Uels) komandaları var.
