Parlament maaşları artırdı
Milli Məclisin 4 may iclasında deputatın statusunu tənzimləyən qanuna dəyişiklik edilib. Novator.az-ın məlumatına görə, Milli Məclis sədrinin aylıq vəzifə maaşı 2250 manatdan 2475 manata qaldırılıb. Qanuna əsasən, sədrin birinci müavini sədrin aylıq vəzifə maaşının 90 faizi, sədr müavini 85 faizi, komitə və komissiya sədri 80 faizi, komissiya sədrinin müavini 75 faizi, deputat isə 70 faizi miqdarında aylıq vəzifə maaşı alır.
“Məhkəmələr və hakimlər haqqında” qanunda dəyişikliyə görə, Ali Məhkəmə sədrinin maaşı 2070 manatdan 2280 manata yüksəlir. “Konstitusiya Məhkəməsi haqqında” qanunda yenilik Konstitusiya Məhkəməsi sədrinin aylıq vəzifə maaşının 2120 manatdan 2335 manata qaldırılmasını nəzərdə tutur. Bu artımlar hakimlərin də maaşının yüksəlməsi deməkdir.
Milli Məclis insan hüquqları üzrə müvəkkilin (ombudsmanın) maaşını da çoxaldıb. 2025 manat maaş alan ombudsmanın maaşı 2230 manat olur.
Yeniliklər 2018-ci il mayın 1-dən tətbiq edilir.
