Yeni vergi departamentinə rəhbər gömrükdən gəldi
Vergilər Nazirliyi yanında İdxal-İxrac Əməliyyatları üzrə Nəzarət Departamentinə baş direktor təyin edilib. APA-Economics-in məlumatına görə, baş direktor postunu Azər Oqtay oğlu Məmmədov tutub. O, Dövlət Gömrük Komitəsinin əməkdaşı idi.
İdxal-İxrac Əməliyyatları üzrə Nəzarət Departamenti bu həftə yaradılıb. Yenilik prezident İlham Əliyevin 20 aprel 2018-ci il sərəncamından irəli gələn vəzifələrin həyata keçirilməsi zərurəti ilə əsaslandırılıb. İdxal-ixrac əməliyyatlarına nəzarət sisteminin təkmilləşdirilməsi ilə bağlı tədbirləri əhatə edən həmin sərəncamda bir sıra idxal-ixrac əməliyyatları üzrə Dövlət Gömrük Komitəsi və Vergilər Nazirliyinin birgə nəzarət mexanizminin tətbiqi məqsədəuyğun sayılıb.
Rəsmi məlumata görə, İdxal-İxrac Əməliyyatları üzrə Nəzarət Departamentinin yaradılmasında məqsəd maliyyə nəzarəti sahəsində uçotun şəffaflaşdırılması, büdcə yığımlarının artırılması, qeyri-neft məhsullarının ixracı üzrə prosedurların sadələşdirilməsi, ixracın həcminin artırılması və bu istiqamətdə dövlətin fiskal siyasətini həyata keçirən orqanların fəaliyyətinə dəstəyin verilməsi, idxal-ixrac əməliyyatlarına nəzarət sisteminin təkmilləşdirilməsidir.
