Təhsil Nazirliyinin rəsmi məlumatları
Təhsil Nazirliyinin telefon məlumat mərkəzinə (“Qaynar xətt”: 146) aprel ayında daxil olan zənglərin və vətəndaşların qəbulu mərkəzində göstərilən xidmətlərin statistikası açıqlanıb. Rəsmi məlumata görə, ay ərzində vətəndaşlarla iş bölməsi ümumilikdə 10185 müraciət alıb.
Telefon məlumat mərkəzində 7357 zəng qəbul edilib, vətəndaşların qəbulu mərkəzində isə 2828 vətəndaşa xidmət göstərilib.
Nazirlik 1173 sənəd (703 məktub, 456 ərizə, 14 digər sənəd) qəbul edib.
Başqa bir rəsmi məlumata əsasən, bu ay Təhsil Nazirliyi müəllimlərin bilik və bacarıqlarının növbəti diaqnostik qiymətləndirməsini keçirəcək. Qiymətləndirmədə bu kateqoriyaya aid şəxslər iştirak edə bilər: əsas iş yeri olaraq müddətsiz əmək müqaviləsi əsasında işləyən müəllimlər; gənclərin çağırışaqədərki hazırlıq rəhbərləri; direktor, direktor müavinləri; məktəbdənkənar və sinifdənxaric işlər üzrə təşkilatçılar; yerli təhsili idarəetmə orqanlarında dövlət qulluğu və metodist vəzifələrində çalışanlar.
Diaqnostik qiymətləndirmədə əvvəlki imtahanlarda aşağı nəticə göstərən, ikinci ixtisası üzrə tədris aparan, habelə daha öncə diaqnostik qiymətləndirmədən keçməyən şəxslər də iştirak edə bilərlər.
Müəllimlərin bilik və bacarıqlarının diaqnostik qiymətləndirilməsində yalnız təhsil sənədləri dövlət nümunəli olan və mövcud qaydaların tələblərinə uyğun şəkildə işə qəbul olunmuş şəxslərin iştirakına icazə verilir.
