İpoteka və Kredit Zəmanət Fondunun səlahiyyəti artdı
Prezident İlham Əliyevin İpoteka və Kredit Zəmanət Fondunun fəaliyyətini təkmilləşdirməyə fərman verib. Bu qurum ötən ilin dekabrında “Azərbaycan İpoteka Fondu” Açıq Səhmdar Cəmiyyəti ilə “Azərbaycan Respublikasının Kredit Zəmanət Fondu” Açıq Səhmdar Cəmiyyətinin birləşdirilməsi ilə yaradılıb. Nizamnaməsinə görə, İpoteka və Kredit Zəmanət Fondu Azərbaycanda əhalinin yaşayış sahəsi ilə uzunmüddətli ipoteka kreditləşməsi vasitəsilə təmin edilməsi mexanizminin yaradılması, ipoteka kreditləşməsinə yerli və xarici maliyyə resurslarının cəlb olunmasına kömək göstərilməsi ilə bağlı işləri yerinə yetirən, habelə sahibkarların müvəkkil banklardan manatla aldıqları kreditlərə təminat verən və həmin kreditlərə hesablanmış faizlərin bir hissəsinə subsidiya verən qeyri-kommersiya hüquqi şəxsidir.
Novator.az-ın məlumatına görə, 1 may fərmanı ilə İpoteka və Kredit Zəmanət Fondu yaşayış sahələrini almaq və satmaq öhdəliyi ilə kirayəyə vermək hüququ əldə edib.
Dövlət başçısı həmçinin ipoteka kreditləri üzrə təminat verilməsi qaydasını təsdiq edib.
Başqa bir fərmanla elektron ipoteka və kredit zəmanət sistemi haqqında əsasnamə rəsmiləşib.
İpoteka və Kredit Zəmanət Fondunun İdarə Heyətinə Fəxri Kazımov sədrlik edir.
