Yeni kabinetin özəllikləri
Nazirlər Kabinetində İlham Əliyevin ilk dəfə prezident seçildiyi 2003-cü ilədək post almış şəxslərin sayı 7 nəfərə düşüb.
İlham Əliyev aprelin 11-də yenidən dövlət başçısı seçilib, aprelin 18-də səlahiyyətlərinin icrasına başlayıb. O, əvvəllər 2003, 2008, 2013-cü illərdə prezident seçilib. 1993-2003-cü illərdə isə onun atası Heydər Əliyev dövlət başçısı olub.
Novator.az bildirir ki, yeni səlahiyyətlərinin icrasına başlayanda İlham Əliyev Nazirlər Kabinetinə Heydər Əliyevin prezidentliyi dövründə gətirilən 6 nəfərə hökumətdə yer verməyib.
1996-cı ildən Nazirlər Kabinetində olan baş nazir Artur Rasizadə, baş nazirin müavinləri Elçin Əfəndiyev (1993-cü ildən kabinet üzvü idi), Abid Şərifov (1995-ci ildən kabinet üzvü idi) yola salınıblar.
Əmək və əhalinin sosial müdafiəsi naziri Səlim Müslümov (2002-ci ildən hökumətdə idi, 2013-cü ilədək Dövlət Sosial Müdafiə Fondunun sədri vəzifəsində çalışıb), ekologiya və təbii sərvətlər naziri Hüseynqulu Bağırov (2001-ci ildən bu postu tuturdu) və Diasporla İş üzrə Dövlət Komitəsinin sədri Nazim İbrahimov da (2002-ci ildən bu vəzifədə idi) kabinetdən kənar qalıblar.
Yeni hökumətdə köhnə qvardiyadan 7 nəfərin təyinatı rəsmiləşib.
Daxili işlər naziri Ramil Usubov və mədəniyyət naziri Əbülfəs Qarayev 1994-cü ildən kabinetdədirlər. Əbülfəs Qarayev 2006-cı ilədək gənclər və idman naziri, 2018-ci ilədək mədəniyyət və turizm naziri vəzifələrində işləyib.
Fövqəladə hallar naziri Kəmaləddin Heydərov 1995-ci ildən hökumətdədir. 2006-cı ilədək Dövlət Gömrük Komitəsinin sədri olub.
Baş nazirin müavini Əli Həsənov 1998-ci ildən hökumətdə yer alır.
Baş nazirin birinci müavini Yaqub Eyyubov hökumətdə 1999-cu ildən təmsil olunur. 2003-cü ilədək baş nazirin müavini postunu tutub.
Fikrət Məmmədov 2000-ci ildən ədliyyə naziridir.
Dövlət Sərhəd Xidmətinin rəisi Elçin Quliyev Nazirlər Kabinetində 2002-ci ildən təmsil olunur.
Hazırda Nazirlər Kabinetində yaşı 50-dən az olan 13 şəxs var. Ən cavan hökumət üzvləri əmək və əhalinin sosial müdafiəsi naziri Sahil Babayev və Dövlət Miqrasiya Xidmətinin rəisi Vüsal Hüseynovdur. Onların hər ikisi 1980-ci ildə anadan olub.
Hökumətdə ən yaşlı şəxs baş nazirin müavini Hacıbala Abutalıbovdur. O, 1944-cü ildə doğulub.
Baş nazirin müavini Yaqub Eyyubov 1945-ci il, baş nazir Novruz Məmmədov 1947-ci il, baş nazirin müavini Əli Həsənov və daxili işlər naziri Ramil Usubov 1948-ci il, müdafiə sənayesi nazir Yavər Camalov 1949-cu il təvəllüdlüdür.
Sevinc Kərimli
