Çin səfərində nələr olub?
Çinə səfər edən müdafiə naziri Zakir Həsənov aprelin 29-da Qərb zona komandanı Çao Conçi ilə görüşüb. Mod.gov.az-ın məlumatına görə, nazir Çinin Dağlıq Qarabağ münaqişəsində Azərbaycanın ədalətli mövqeyini dəstəklədiyini vurğulayıb, təşəkkürünü çatdırıb. Zakir Həsənov qeyd edib ki, Azərbaycan Çin Xalq Respublikasının vahid Çin siyasətinə hörmətlə yanaşır, bu konsepsiyanı dəstəkləyir və beynəlxalq aləmdə bu ölkəni təmsil edən təşkilatları tanıyır.
Görüşdə hərbi, hərbi-texniki, hərbi təhsil və qarşılıqlı maraq doğuran digər sahələrdə əməkdaşlığın inkişaf perspektivləri müzakirə olunub.
Həmin gün Zakir Həsənov hərbi sənaye kompleksinə daxil olan “Poly Technologies” şirkətinə baş çəkib. Şirkətin rəhbərliyi ilə görüşdə Zakir Həsənova müdafiə sənayesi müəssisəsinin fəaliyyəti barədə ətraflı məlumat verilib. Nazir müəssisənin istehsal etdiyi müasir döyüş texnikası və digər hərbi təyinatlı məhsullarla tanış olub.
Səfərin əvvəlki günlərində Zakir Həsənov müdafiə sənayesi sahəsində yüksək texnologiyalı məhsullar istehsal edən “CETC İnternational” şirkətinə gedib, Çin Xalq Respublikası Mərkəzi Hərbi Şurasının sədr müavini Su Çilian, Çin Xalq Respublikası Dövlət Şurasının üzvü, milli müdafiə naziri Vey Fenxe ilə görüşlər keçirib.
Aprelin 27-də Azərbaycanın Müdafiə Nazirliyi və Çinin Milli Müdafiə Nazirliyi arasında hərbi yardımın göstərilməsinə dair sənəd imzalanıb.
