Sahibkarlar yeni kreditlər aldı
İqtisadiyyat Nazirliyinin Sahibkarlığa Kömək Milli Fondu aprelin 27-si Göygöl rayonunda işgüzar forum keçirib. Forumda çıxış edən icraçı direktor müavini Arif Vəliməmmədov deyib ki, 2018-ci ilin ötən dövrü ərzində sahibkarlıq subyektlərinin ümumi dəyəri 364,5 milyon manat olan 269 investisiya layihəsi maliyyələşdirilib. Onun sözlərinə görə, bu layihələrin reallaşdırılması 5600-dən çox yeni iş yerinin açılmasına imkan yaradır.
Rəsmi məlumata əsasən, forum çərçivəsində Gəncə-Qazax iqtisadi rayonunda fəaliyyət göstərən 35 sahibkara 7,3 milyon manat güzəştli kredit verilib. Kreditlərin aqroparkın yaradılması, un məmulatlarının, tikinti materiallarının istehsalı, üzümçülük, tərəvəzçilik, heyvandarlıq və sair sahələrin inkişafına yönəldiləcəyi və 200-dən çox yeni iş yerinin açılacağı bildirilir.
Forumda indiyədək Gəncə-Qazax iqtisadi rayonunda fəaliyyət göstərən sahibkarlıq subyektlərinin 257,1 milyon manat güzəştli kredit aldığı açıqlanıb.
Sahibkarlığa Kömək Milli Fondu 2009-cu ildən fəaliyyət göstərir.
