Pompeo dövlət katibi postuna təsdiqləndi
ABŞ Senatı aprelin 26-da Mayk Pompeonu dövlət katibi (xarici işlər naziri) postuna təsdiqləyib. Novator.az-ın məlumatına görə, Mayk Pompeo 100 senatordan 57-nin səsini alıb.
Mayk Pompeo 1963-cü ildə Orinc şəhərində (Kaliforniya ştatı) doğulub. 1986-cı ildə Uest-Poynt Hərbi Akademiyasını bitirib. 1991-ci ilə qədər ABŞ Silahlı Qüvvələrində xidmət edib.
Hərbi xidmətdən sonra Mayk Pompeo Harvard Universitetinin hüquq fakültəsində təhsil alıb, uzun illər hüquq firmalarında və biznes qurumlarında çalışıb.
2011-2017-ci illərdə Mayk Pompeo Konqresdə Kanzas ştatını təmsil edib. 2017-ci ilin yanvarından Mərkəzi Kəşfiyyat İdarəsinin direktoru olub. Bu il martın 13-də prezident Donald Tramp onu dövlət katibi təyin edib. O, Reks Tillersonu əvəzləyib.
