Mülkiyyət hüququnu təsdiqləyən sənəd 1 günə veriləcək
Daşınmaz əmlakın qeydiyyatı sahəsində yenilik var. Əmlak Məsələləri Dövlət Komitəsinin məlumatına görə, əmlak çıxarışlarının verilmə müddəti azaldılıb: “Vətəndaşlar əmlakları üzərində mülkiyyət hüququnu təsdiqləyən çıxarışı 1 iş günü müddətində ala biləcək. Bu, Nazirlər Kabineti müvafiq qaydalara dəyişiklik etdikdən sonra mümkün olub. Dəyişikliyə əsasən, vətəndaşların təqdim etdikləri ərizə onların istəyi əsasında daha sürətlə icra ediləcək. Vətəndaşlar daşınmaz əmlak üzərində hüquqların dövlət qeydiyyatını təsdiqləyən çıxarışları 1 gün, 3 gün və 7 iş günü müddətində ala biləcəklər.
Qeydiyyat prosesi zamanı mərzçəkmə və inventarlaşdırma işlərinin aparılmasına ehtiyac yaranarsa, ərizələr 2 gün, 5 gün və 10 iş günü müddətində icra ediləcək. İpotekanın dövlət qeydiyyatı ilə bağlı ərizələr isə 1 və 2 iş günü müddətində icra olunacaq”.
