Prezident İlham Əliyev Londonda görüşlər keçirir
Aprelin 26-da prezident İlham Əliyev Böyük Britaniyanın baş naziri Tereza Meyin dəvəti ilə bu ölkəyə səfərə yollanıb.
AZƏRTAC xəbər verir ki, həmin gün Azərbaycanın dövlət başçısı Londonda BP şirkətinin baş icraçı direktoru Robert Dadli ilə görüşüb. Görüşdə “Şahdəniz” layihəsi üzrə görülən işlər, həmçinin bu ilin iyununda TANAP layihəsinin açılışı ilə bağlı fikir mübadiləsi aparılıb. “Şəfəq-Asiman” strukturu üzrə imzalanmış hasilatın pay bölgüsü sazişi əsasında görülən işlərin intensivləşdirilməsinin əhəmiyyəti qeyd edilib.
Aprelin 26-sı prezident İlham Əliyev Britaniyanın Avropa və Amerika məsələləri üzrə dövlət naziri Alan Dunkanla da görüşüb. Görüşdə ikitərəfli və regional əməkdaşlıq məsələləri, Qarabağ münaqişəsinin həlli ilə bağlı danışıqlar prosesi müzakirə olunub.
Ticarət və ixracın təşviqi üzrə dövlət naziri Rona Feyrhedlə görüşdə investisiya, biznes əlaqələri, kənd təsərrüfatı sahələrində əməkdaşlıq məsələləri ətrafında fikir mübadiləsi aparılıb.
Prezident İlham Əliyevin Böyük Britaniya parlamentinin İcmalar Palatasının üzvü Bob Bləkmən, Lordlar Palatasının üzvü Lord Devid Evans və İcmalar Palatasının üzvü, Şimali İrlandiya üzrə dövlət nazirinin müavini Devid Morrislə də görüşü olub.
