Nikol Paşinyan

26 Aprel 2018
comments
Səidə Hüseynova
Posted in Aktual Manşet Şərh

Novator.az Ermənistanda Serj Sərkisyan hakimiyyətinə son qoyan inqilabın lideri Nikol Paşinyanın ömür yolundan bəzi məqamları təqdim edir.

Nikol Paşinyan 1975-ci il iyunun 1-də Ermənistanın İcevan şəhərində doğulub, orada orta təhsil alıb.

1991-ci ildə Yerevan Dövlət Universitetinin filologiya fakültəsinin jurnalistika şöbəsinə daxil olub. Təhsil aldığı illərdə “Dprutyun” və “Lraqir” qəzetlərində müxbir, “Molorak” nəşrində redaktor vəzifələrində çalışıb.

Nikol Paşinyanın siyasi mülahizələrlə universitetdən qovulduğu üçün ali təhsil diplomu ala bilmədiyi deyilir.

1998-ci ildə Nikol Paşinyan “Oraqir” qəzetini təsis edərək bu nəşrin baş redaktoru postunu tutub. 1999-cu ildə qəzet prezident Robert Köçəryana müxalif mövqeyinə gərə qapadılıb.

2000-ci ildən Nikol Paşinyan müxalif “Aykakan jamanak” qəzetinin baş redaktoru olub.

2007-ci ildə Nikol Paşinyan parlament seçkisinə qatılan “İmpiçment” blokuna rəhbərlik edib. Robert Köçəryanın istefasına çağıran bu blok parlamentə düşə bilməyib. O vaxt Nikol Paşinyan seçkinin nəticələrinin saxtalaşdırıldığını iddia edərək paytaxt Yerevanın Azadlıq meydanında oturaq aksiya keçirib.

2008-ci ilin prezident seçkisində o, sabiq dövlət başçısı Levon Ter-Petrosyanın seçki qərargahının üzvü kimi fəaliyyət göstərib. Həmin seçkini Serj Sərkisyan udub. Seçkinin nəticələrinə qarşı aksiyaların yatırılması 10 nəfərin ölümünə gətirib.

Nikol Paşinyan həmin aksiyalarda iştirakına görə cinayət məsuliyyətinə alınıb, amma gizləndiyi üçün onu tutmaq mümkün olmayıb. 2009-cu ildə Nikol Paşinyan polisə təslim olaraq həbsə göndərilib, 2011-ci ildə amnistiyaya düşərək azadlığa çıxıb.

2012-ci ilin parlament seçkisinə birinci prezident Levon Ter-Petrosyanın başçılıq etdiyi Erməni Milli Konqresindən qatılan Nikol Paşinyan deputat mandatı alıb.

2013-cü ildə Nikol Paşinyan Vətəndaş Sazişi Partiyasının sədri seçilib. 2017-ci ilin parlament seçkisində Vətəndaş Sazişi Partiyası daha iki partiya ilə birgə “Çıxış” bloku yaradıb. Blok 105 nəfərlik parlamentə 9 mandat qazanıb.

2018-ci il martın 31-dən aprelin 13-dək Nikol Paşinyan Ermənistanın bir çox şəhəri boyunca sabiq prezident Serj Sərkisyanın baş nazir olmaq niyyətinə qarşı yürüş keçirib. Aprelin 13-dən Yerevanda onun başçılığı ilə keçirilən davamlı aksiyalarda Serj Sərkisyanın hakimiyyətdən getməsi tələb edilib.

Aprelin 16-sı Yerevanda Serj Sərkisyana qarşı aksiyalara polisin müdaxiləsi nəticəsində Nikol Paşinyan əlindən yaralanıb.

Serj Sərkisyan aprelin 17-də baş nazir kürsüsünə oturub.

Aprelin 22-də Nikol Paşinyan tutulub, ancaq növbəti gün azadlığa çıxıb.

Aprelin 23-də Serj Sərkisyan baş nazir postundan istefa verib.

Mayın 1-i parlamentdə seçiləcəyi gözlənən baş nazir postuna əsas namizəd Nikol Paşinyandır.