Veteranlar üçün 5,9 milyon manat ayrılır
Əmək və Əhalinin Sosial Müdafiəsi Nazirliyi prezident İlham Əliyevin İkinci Dünya müharibəsi iştirakçılarına, həlak olmuş və ya sonralar vəfat etmiş döyüşçülərin dul arvadlarına, arxa cəbhədə fədakar əməyinə görə orden və medallarla təltif edilmiş şəxslərə birdəfəlik maddi yardım verilməsi haqqında sərəncamının icrası ilə bağlı açıqlama yayıb.
Sərəncam aprelin 20-də imzalanıb.
Nazirlik bildirir ki, sərəncam ümumilikdə 11 min 193 nəfərə şamil olunacaq. Onların 563 nəfəri İkinci Dünya müharibəsi əlilləri və iştirakçılarıdır, hər birinə 1000 manat məbləğində birdəfəlik maddi yardım ödənəcək.
Qalan 10 min 630 nəfər İkinci Dünya müharibəsində həlak olmuş və ya sonralar vəfat etmiş döyüşçülərin dul arvadları, həmin dövrdə arxa cəbhədə fədakar əməyinə görə orden və medallarla təltif edilmiş şəxslər, İkinci Dünya müharibəsi illərində döyüş cəbhələrinin arxa hüdudları, yaxud döyüşən donanmaların əməliyyat zonaları daxilində ordunun və donanmanın mənafeyi üçün tapşırıqları yerinə yetirmiş xüsusi birləşmələrin işçiləri, İkinci Dünya müharibəsi dövründə Leninqrad şəhərinin müdafiəsinə görə müvafiq medal və döş nişanı ilə təltif edilmiş insanlar, habelə Leninqrad şəhərinin mühasirəsi iştirakçılarıdır. Bu insanların hər birinə 500 manat məbləğində birdəfəlik maddi yardım veriləcək.
Birdəfəlik maddi yardımlar üçün 2018-ci ilin dövlət büdcəsindən, prezidentin ehtiyat fondundan 5,9 milyon manat ayrılması nəzərdə tutulub.
Novator.az xatırladır ki, 1939-cu ildə başlayan İkinci Dünya müharibəsində Sovet İttifaqının və onun müttəfiqlərinin Almaniya üzərində qələbəsi 1945-ci il mayın 9-da rəsmiləşib.
1941-1945-ci illərdə SSRİ-nin alman işğalına qarşı apardığı müharibədə Azərbaycandan 640 mindən çox adam döyüşüb. Onların təxminən yarısı həlak olub, 130-dan çox azərbaycanlı döyüşçü Sovet İttifaqı Qəhrəmanı adına layiq görülüb, 170 mindən çox əsgər və zabit müxtəlif orden və medallarla təltif edilib.
