Mandat bölgüsü yenilənir: 68+39+12
Yeni Azərbaycan Partiyasının parlament fraksiyasının üzvlərinin sayı 68-ə düşür. Novator.az bildirir ki, 2015-ci il noyabrın 1-də keçirilmiş seçkidə hakim partiyadan 71 nəfər Milli Məclisə mandat alıb. 2016-cı il iyunun 18-də keçirilmiş təkrar seçkidə daha 1 YAP-çı deputat seçilib.
2017-ci ilin fevralında YAP-ın sədr müavini, 14 saylı Xəzər dairəsindən deputat Mehriban Əliyeva birinci vitse-prezident təyin olunub. Mərkəzi Seçki Komissiyası martda onun deputat mandatına xitam verib.
Bu ilin aprel ayında 120 saylı Cəbrayıl-Qubadlı dairəsindən YAP-çı deputat Astan Şahverdiyev vəfat edib.
Daha iki YAP-çı Milli Məclis üzvü icra hakimiyyətinə keçirilib. Bu ay 43 saylı Sumqayıt dairəsindən deputat Muxtar Babayev ekologiya və təbii sərvətlər naziri, 91 saylı Ucar dairəsindən deputat Vüsal Hüseynov Dövlət Miqrasiya Xidmətinin rəisi təyin edilib.
Partiyasız parlament üzvlərinin sayı isə 41-dən 39-a enir. Apreldə 34 saylı Xətai dairəsindən deputat Fuad Muradov Diasporla İş üzrə Dövlət Komitəsinin sədri, 101 saylı Göygöl-Daşkəsən dairəsindən deputat Rövşən Rzayev Qaçqınların və Məcburi Köçkünlərin İşləri üzrə Dövlət Komitəsinin sədri postuna təyinat alıb.
Daha 12 deputat başqa partiyaları təmsil edir. Vətəndaş Həmrəyliyi Partiyasının 2, Ana Vətən Partiyası, Bütöv Azərbaycan Xalq Cəbhəsi Partiyası, Demokratik İslahatlar Partiyası, Böyük Quruluş Partiyası, Vətəndaş Birliyi Partiyası, Sosial Rifah Partiyası, Sosial Demokrat Partiyası, Vəhdət Partiyası, Demokratik Maarifçilik Partiyası və Milli Dirçəliş Hərəkatı Partiyasının hərəyə 1 mandatı var.
Beləliklə, 125 nəfərlik Milli Məclisdə hazırda 6 deputat yeri boş qalır.
