İsa Qəmbərin müalicəsi müsbət effekt verməkdədir
Milli Strateji Düşüncə Mərkəzinin sədri İsa Qəmbərin müayinə və müalicəsi davam etdirilir.
İsa Qəmbər Almaniyadakı klinikaların birində müalicə olunur.
Aprelin 25-də İsa Qəmbərin xanımı Aida Qəmbər Novator.az-a bildirib ki, müalicələr müsbət effekt verməkdədir.
Aida Qəmbər həyat yoldaşının Bakıya nə vaxt dönəcəyinin hələ bilinmədiyini söyləyib.
61 yaşlı İsa Qəmbər milli azadlıq hərəkatının liderlərindən biridir. 1990-1995-ci illərdə parlamentin deputatı, 1992-1993-cü illərdə Milli Məclisin sədri olub, 1992-ci il mayın 18-dən iyunun 17-dək prezident səlahiyyətlərini icra edib. 1992-2014-cü illərdə Müsavat Partiyasının başqanı postunu tutub.
İsa Qəmbər 2018-ci ilin yanvar və fevral aylarında Bakıdakı Mərkəzi Klinik Xəstəxanada, fevralın sonundan mart ayının ortalarınadək Türkiyə paytaxtı Ankaranın Hacettepe Universitetinin xəstəxanasında ürəyindən müalicə olunub, aprelin 4-də Almaniyaya gedib.
