İlk ziyarət necə başlayıb?
Ankara səfərində olan prezident İlham Əliyev aprelin 24-də Heydər Əliyev Parkına baş çəkib. AZƏRTAC bildirir ki, Heydər Əliyev Parkı 2004-cü ildə salınıb. 2012-ci ildə parkda əsaslı yenidənqurma işləri aparılıb. İstirahət məkanında mərasim meydanı, idman meydançası, uşaq əyləncə sahəsi var. Parkın ərazisində “Buta” Azərbaycanı Təbliğ Evinin tikintisi yekunlaşmaq üzrədir.
Həmin gün İlham Əliyev və Türkiyə prezidenti Rəcəb Teyyub Ərdoğanla birgə şam edib.
Dünən başlayan səfər yenidən prezident seçilmiş İlham Əliyevin ilk xarici səfəridir.
İlham Əliyev aprelin 11-də 8 namizədin iştirakı ilə keçirilmiş prezident seçkisində 7 il müddətinə prezident seçilib, aprelin 18-də səlahiyyətlərinin icrasına başlayıb.
56 yaşlı İlham Əliyev 1994-cü ildən Azərbaycanda rəhbər vəzifələr tutur. Azərbaycan Dövlət Neft Şirkətinin vitse-prezidenti, birinci vitse-prezidenti (eyni zamanda Milli Məclisin deputatı), baş nazir olub. 2003-cü il oktyabrın 15-də, 2008-ci il oktyabrın 15-də və 2013-cü il oktyabrın 9-da prezident seçilib.
2016-cı ildə konstitusiyaya edilmiş dəyişikliklə prezidentlik müddəti 5 ildən 7 ilə qaldırılıb.
