“Qarabağ” Çempionlar Liqasına nə vaxt, kimlərlə başlayır?
2018-2019 mövsümündə Azərbaycanı UEFA Çempionlar Liqasında Ağdamın “Qarabağ” komandası təmsil edəcək. Novator.az bildirir ki, yeni reqlamentlə 26 komanda Çempionlar Liqasının qrupuna birbaşa çıxır. Qrupa digər 6 vəsiqənin taleyinə seçmə raundlarda aydınlıq gələcək. 4 vəsiqə ölkə çempionları üçün nəzərdə tutulub. Bu istiqamətdə təsnifat mərhələlərinin sayı 4-dən 5-ə artıb.
Cəbəllütariq, Andorra, San Marino və Kosovo çempionları mübarizəyə ən aşağıdan – ilkin təsnifatdan start verəcək.
Azərbaycan çempionu “Qarabağ” turnirə bundan sonrakı raunddan – 1-ci mərhələdən başlayacaq. Həmin raundu, ardınca 2-ci, 3-cü və 4-cü mərhələləri keçib qrupa düşmək olar.
İlkin təsnifat mərhələsinin yarımfinal görüşləri iyunun 26-da, final oyunu iyunun 29-da keçiriləcək.
1-ci mərhələnin oyunları 10-18 iyul arası olacaq. “Qarabağ” yüksək reytinqli klub kimi həmin mərhələnin güclülər səbətində yer alacaq. Artıq onun bəzi potensial rəqibləri də məlumdur: “Vikinqur” (Farer adaları), “Sutyeska” (Monteneqro), “Suduva” (Litva), “Kork Siti” (İrlandiya), “Spartaks” (Latviya), “Valyur” (İslandiya), “Flora” (Estoniya), “Torpedo” (Gürcüstan).
Novator.az xatırladır ki, bu mövsüm Çempionlar Liqasının C qrupunda yarışan “Qarabağ” 2 xalla dördüncü pilləni tutub. Ağdamlılar İngiltərənin “Çelsi” klubuna 0:4 və 0:6, İtaliya “Roma”sına 1:2 və 0:1 hesabı ilə uduzub, İspaniyanın “Atletiko” klubu ilə xalları bölüb (0:0, 1:1).
“Roma” hazırda Çempionlar Liqasının, “Atletiko” Avropa Liqasının yarımfinalında mübarizəni davam etdirir.
