Hökumətdə yaşı 50-dən az olan 13 nəfər var
Prezident İlham Əliyevin 23 aprel sərəncamı ilə Nazirlər Kabinetinin üzvü təyin olunan şəxslərdən 5-nin yaşı 50-dən azdır. Novator.az-ın məlumatına görə, onların ən gənci Dövlət Miqrasiya Xidmətinin rəisi vəzifəsinə təyinat alan deputat Vüsal Hüseynovdur. Vüsal Hüseynov 1980-ci ildə anadan olub.
Yeni hökumətdə Diasporla İş üzrə Dövlət Komitəsinin sədri postuna gətirilən deputat Fuad Muradov 1979-cu ildə doğulub.
Dövlət Turizm Agentliyinə sədr təyin olunan Fuad Nağıyev 1975-ci ildə dünyaya gəlib.
Aprelin 23-də Dövlət Gömrük Komitəsi sədrinin birinci müavini postundan sədr vəzifəsinə keçirilən Səfər Mehdiyev və təhsil nazirinin müavini vəzifəsindən nazir postuna adlayan Ceyhun Bayramov 1973-cü il təvəllüdlüdür.
Nazirlər Kabinetində yaşı 50-dən az olan daha 8 şəxs var: əmək və əhalinin sosial müdafiəsi naziri Sahil Babayev (1980-ci ildə anadan olub); nəqliyyat, rabitə və yüksək texnologiyalar naziri Ramin Quluzadə; kənd təsərrüfatı naziri İnam Kərimov; Xarici Kəşfiyyat Xidmətinin rəisi Orxan Sultanov (1977-ci il təvəllüdlü); vergilər naziri Mikayıl Cabbarov (1976-cı il təvəllüdlü); Dövlət Şəhərsalma və Arxitektura Komitəsinin sədri Samir Nuriyev (1975-ci il təvəllüdlü); Qida Təhlükəsizliyi Agentliyinin sədri Qoşqar Təhməzli (1970-ci il təvəllüdlü); energetika naziri Pərviz Şahbazov (1969-cu il təvəllüdlü).
Leyla Hacıyeva
