Hökumət necə böyüyüb?
Səlahiyyət müddəti aprelin 21-də başa çatan Nazirlər Kabinetinin 37 üzvü vardı. 34 qurumdan (18 nazirlik, 9 komitə, 5 xidmət, 1 agentlik, 1 idarə) ibarət hökumətdə bir nazir, bir komitə sədri postu boş idi.
Novator.az bildirir ki, yeni Nazirlər Kabineti 36 qurumdan (18 nazirlik, 8 komitə, 5 xidmət, 4 agentlik, 1 idarə) ibarətdir. Hazırda baş nazir və onun müavinləri ilə birgə Nazirlər Kabinetinin 38 üzvü var. 2 agentliyə (Antiinhisar və İstehlak Bazarına Nəzarət Dövlət Agentliyi, Əqli Mülkiyyət Agentliyi) rəhbərlər təyin olunmayıb. Milli Arxiv İdarəsinin rəisi səlahiyyətlərini isə əvvəlki rəis Ataxan Paşayev icra edir.
Azərbaycan Konstitusiyasında Nazirlər Kabinetinin statusu prezidentin yuxarı icra orqanı kimi müəyyən olunub. Ana qanuna görə, ölkə prezidenti icra səlahiyyətlərinin həyata keçirilməsinin təşkili məqsədi ilə Nazirlər Kabineti yaradır. Prezidentə tabe olan, onun qarşısında cavabdehlik daşıyan qurumun əsas səlahiyyətləri dövlət büdcəsinin hazırlanması və icrası, maliyyə-kredit və pul siyasətinin, dövlət iqtisadi və sosial proqramlarının həyata keçirilməsi, nazirliklərə və digər mərkəzi icra hakimiyyəti orqanlarına rəhbərlikdir.
